Een van die mees wonderlike dinge van die skepping van die mens is dat hy na die beeld van God geskape is. Toe was hy in sommige opsigte soos God. Niks kan heerliker wees nie.

Die mens kon nie fisies soos God wees nie, want God is ʼn Gees wat niemand gesien het of ooit kan sien nie (Joh. 4:24; 1 Tim. 6:16). Die beeld was dus ʼn geestelike beeld. In Efesiërs 4:24 en Kolossense 3:10 word aan ons gesê dat daar drie aspekte is waarin die mens geestelik  soos God was: geregtigheid, heiligheid, en ware kennis van God. Só was die mens voor hy in sonde en verdoemenis geval het.

Hy het die beeld van God gedra sodat hy God kan ken, Hom kan liefhê en in vreugde met Hom kan lewe. Dit is vir die diere en die onbesielde skepping, wat niks van die beeld van God het, onmoontlik.

Die vraag word dikwels gevra of daar nog iets van die beeld van God in die gevalle, sondige mens oorgebly het. Dit is ʼn belangrike vraag. As die mens in sy sondige toestand enigiets van God in hom oor het, moet daar in hom iets goed en verdienstelik wees, want God is altyd goed. As die mens niks van die beeld van God oor het nie, kan daar niks goed meer in hom wees nie, want God alleen is goed. 

Die Bybel gee ʼn duidelike antwoord op hierdie vraag. Die antwoord van die Bybel is dat die gevalle mens niks van die beeld van God behou het nie. Dit is nie moontlik om te glo dat die volslae verdorwe sondaar nog soos God kan wees nie. In Johannes 8:44 sê Jesus vir die ongelowige Fariseërs, en aan almal wat nie in Hom glo nie: “Julle het die duiwel as vader, en die begeertes van julle vader wil julle doen”. Die enigste geestelike beeld wat die mens dus dra, en wat ook uit sy werke blyk, is die ewebeeld van Satan.

Die Bybel beantwoord die vraag of die mens nog die beeld van God dra, ook in Efesiërs 4:24 en Kolossense 3:10 waar daar staan dat ons redding beteken dat ons vernuwe word na die beeld van Hom wat ons geskape het. Wanneer ons gered word, vernietig God die beeld van satan in ons en herskep ons na sy eie beeld; deur die Gees van Jesus Christus laat Hy ons wedergebore word en gee ons weer geregtigheid, heiligheid en ware kennis. Efesiërs 4:24 en Kolossense 3:10 sê dat die beeld van God uit hierdie drie gawes bestaan: geregtigheid, heiligheid en ware kennis. Totdat daardie beeld herskep en hernuwe is, het die gevalle mens nie een van hierdie gawes nie. Net hulle wat in Christus vernuwe is, het dit.

Is u vernuwe na die beeld van God? As u ‘ja’ sê, toon u dade en woorde dat u soos Hy is? Hoe jammer sou dit wees as dit nie so is nie. Wat ʼn skande om te sê ons is gered en dra die beeld van God, terwyl ons voortgaan om soos die duiwel op te tree. Wat ʼn wonderlike getuienis van die reddende genade van God is dit daarenteen wanneer ons soos Hy is — nabootsers van Hom, soos geliefde kinders.