In die Mei-uitgawe van ons blad het ons swaarde gekruis met Deon Maas se mening dat Satanisme erken behoort te word as een van die “godsdienste” in ons land.

Die onlangse gebeure in Krugersdorp toe Morné Harmse na bewering vir Jacques Pretorius by die Hoër Tegniese Skool Nic Diederichs blindelings met ’n swaard doodgekap het, het die debat oor Satanisme (en skolegeweld) opnuut en hardhandig onder ons aandag gebring. Harmse se ouers het immers in ’n mediaverklaring uitdruklik vermeld dat hulle seun “met Satanisme geëksperimenteer het” (Beeld, 21-08-2008:1).

Om die oorsaak van die tragiese gebeure slegs aan psigiatriese versteuring toe te skryf, is ’n baie eensydige benadering. Ongetwyfeld het die Satan (en Satanisme) ’n bepalende rol gespeel.

Satanisme⤒🔗

’n Mens kan jou moeilik so ’n soort van “godsdiens” voorstel, ’n “godsdiens” waar die Christelike geloof presies in sy teendeel omgekeer word, met ’n Satanskerk, ’n Satansdoop, ’n Satansnagmaal, ’n Satansbybel, ’n Satansdag, ’n Satansbelydenis, Satansliedere en ’n Satanshuwelik. Satanisme is basies ’n beweging waar aan menslike genot vrye teuels gegee word: doen wat jy wil; doen alles wat lekker is; bevredig al jou begeertes; leef jou ten volle uit. Grensloos.

Die eienaardige van die moderne Satanisme is dat dit nie in die bestaan van Satan glo nie en dus ook nie as doelbewuste en direkte verering van Satan beskou kan word nie. En tog lewer navorsing bewyse dat daar (bv. in Engeland) talle intelligente mense is wat by hierdie beweging betrokke is.

Kerk en Satanisme←⤒🔗

Wanneer die kerk oor Satanisme besin, moet veral teen twee uiterstes gewaak word:

Enersyds moet daarteen gewaak word om buitensporige aandag aan Satan (en demone) te bestee, só asof hy/hulle al ons aandag verdien. Die Nuwe Testament verkondig dat God in Christus die bose magte ontwapen en hulle in die openbaar bespotlik voorgestel het (Kol 2:15) en dat Christus gekom het om die werk van die duiwel tot niet te maak (1 Joh 3:8).

Die oorwinning in Christus staan in die Bybel veel meer sentraal as die aanslae van die duiwel. Te veel aandag aan die duiwel laat hom dink dat hy belangriker as Christus is.

Andersyds moet ons ook nie die aanslae van die duiwel en die bose magte onderskat nie. Die duiwel loop rond soos ’n brullende leeu en soek na iemand om te verslind (1 Pet 5:8). Daar heers ’n groot stryd teen die bose magte (Ef 6:12). Daarom mag ons, vervul deur die Gees van God, nooit ophou bid “verlos ons van die Bose” nie (Matt 6:13).

Christene word opgeroep om die duiwel altyd teen te staan (Jak 4:7) en om hom nooit vatkans te gee nie (Ef 4:27).

Kerk, skool en ouers←⤒🔗

Die kerk het in hierdie verband ’n groot verantwoordelikheid om kinders in die katkisasieklasse van die nodige geloofstoerusting te voorsien, te waarsku teen die gevare van Satanisme (en ander bose strominge) en hulle te bemoedig om vanuit die oorwinning in Christus te lewe en die toekoms in te gaan.

Ook skole, skoolhoofde, onderwysers en bestuursrade dra ’n swaar verantwoordelikheid, veral noudat skole-geweld onrusbarend aan die toeneem is. Hoe kon dit gebeur het dat ’n jong seun in Krugersdorp ongemerk met drie swaarde by die skool opgedaag het?

Dit is waar dat die basiese opvoeding in die ouerhuis begin, maar dit is ook waar daardie opvoeding in die skole voortgesit – en nie bedreig – behoort te word nie.

Ouers het in hierdie verband ’n onoorsienbare taak. Hulle moet goed met hulle (veral groterwordende) kinders kommunikeer, beskikbaar wees om probleme te bespreek, betyds wees om afwykende gedrag waar te neem en te hanteer en in die algemeen hulle kinders in die “vrees van die Here” opvoed, dit wil sê in liefde vir God en liefde vir hulle medemens.

Ouers sal veral indringend aandag moet gee aan die vraag of Satanisme as deel van die vak Lewensoriëntering aan graad 11-leerlinge op skool aangebied gaan word (Beeld, 29-08-2008:4).

In hierdie leerplan sal volgens die mediaberig aandag bestee word aan ’n gebed aan Satan, ’n uiteensetting van die “kerk van Satan” as organisasie, ’n getrouheidseed aan Satan, die wette en reëls van die “kerk”, die hoofrigtings, kentekens en doelstellings van Satanisme asook verse uit die satanistiese bybel.

Slot←⤒🔗

In Bybelse perspektief gesien is daar net een antwoord: Satanisme lei na die afgrond; die geloof in Christus bring hoop en hou die toekoms oop.