Desember is vakansietyd, rustyd. Daarom is dit ook nodig dat ons vra : Hoekom wil ons rus? Hoe wil ons rus? In die gejaagde lewe van vandag is nie net rus soms nodig nie, maar ook tyd om na te dink oor wat ons doen en hoe ons dit doen. Rustyd is goed vir die liggaam, maar ons het ook rustyd nodig om weer ons verhouding met God te ondersoek en ook daarin reg te stel wat verkeerd is.

Oor die hoekom van rustyd kan gekyk word na die Vierde gebod. In Eks 20:11 word die rusdag gemoti­veer vanuit die patroon van die skepping, waar God na die skeppingswerk van ses dae op die sewende dag gerus het. In Deut. 5:14, 15 word die rusdag verbind aan die slawerny in Egipte, waar daar blykbaar arbeid sonder rus was. Prediker sê dat die arbeider se slaap soet is (5:11). Die een wat hard en getrou gewerk het, is geregtig op rustyd – tyd om sy kragte weer op te bou en sy lewe mooi in perspektief te sien. Om sonder rus maar jaar in en jaar uit te werk, bring verslawing aan die arbeid en dit is beslis nie tot God se eer nie. Soos die arbeider sy loon werd is (Luk 10:7), is hy ook op sy rus geregtig tydens sy werksweek maar ook in vakansietyd. Wie homself afsloof sonder om homself rustyd te gun, doen sy liggaam – en sy gesin – skade aan.

Oor die hoe van rustyd sal mense natuurlik verskil. Party rus met ’n boek en ander rus in die berge. Party wil fisies aktief wees en ander wil liewer in die son lê en brand. Hieroor kan daar wel geen eenvormige resep wees nie – soos mense onderling verskil, sal ook hulle rusprogram verskil. Party kan feitlik nie meer ontspan nie – en hulle sal moet werk aan ’n sinvolle manier van rus.

Tog is daar sekere dinge waaraan aandag gegee moet word. Soveel vaders is vandag wat hulle gesin betref afwesig. Die pa sal moet sorg dat hy sy rusprogram ook daarop instel om aan sy kinders – en vrou – die aandag te gee wat dikwels gedurende die jaar ontbeer moet word. Daar moet tyd ingeruim word vir saamkyk en saamdoen en veral saamgesels veral – oor God en sy Woord en sy genade. Ons moet hierby besef dat ons geloof nooit rus nie. Rustyd moet daarom veral ook tyd wees wanneer daar goed nagedink word oor die lewe, oor ons daaglikse arbeid, oor ons lewe-met-God. Die ware rus is die rus wat Christus gee, wat nie net in vakansietyd te vinde is nie, maar wat altyd die deel is van hulle wat sy genade ken en ervaar. Die ware rus kom wanneer daar altyd gevra word na die goeie weg en daarin gewandel word (Jer. 6:16).

Geniet dus die rustyd wat voorlê, maar wees altyd wakker in die geloof en ywerig in God se diens. Daarin is die rus geleë wat langer as ’n Desembervakansie duur.