Vol verwagting kom Annie by die trap af. Is die sitkamer met slingers versier? Is daar ballonne aan haar stoel vasgemaak? Lê daar weer ʼn “veels geluk”-kaartjie op haar bord, met almal se name daarin geskryf? En ruik sy al die lekker broodjies? Ja, sy hoor die ander sing: “Veels geluk, liewe maatjie!”

Annie verjaar vandag. Die laaste paar dae het sy die slapies afgetel. Eindelik het die dag aangebreek! Die feesdag!

Spesiale aandag⤒🔗

ʼn Feesdag is ʼn besondere dag. ʼn Fees is volgens die woordeboek ʼn plegtige viering van ʼn belangrike gebeurtenis. Om te vier beteken: feestelik (of in rus) deurbring of gedenk. Fees en vier hoort dus bymekaar.

Op ʼn feesdag gebeur daar dinge wat nie andersins gebeur nie. Dit is omdat daar aandag gegee word aan ʼn belangrike gebeurtenis. Daar word aandag gegee aan iemand wat verjaar, of aan ʼn bruidspaar, ʼn oupa en ouma wat 40 jaar getroud is, ʼn pa en ma wat so pas ʼn baba gekry het, ʼn seun wat sy swemdiploma behaal het, ʼn dogter wat haar eerste skooldag beleef.

Gedenktekens←⤒🔗

By ʼn feesviering is ʼn vreugdevolle stemming gepas. Gevoelens speel op so ʼn dag in elk geval ʼn groot rol, omdat feesviering verband hou met herdenking. Herinneringe kom na vore. Dit gee aanleiding tot gevoelens.

ʼn Fees is ʼn soort gedenkteken. Ons lees van sulke gedenktekens in die Bybel, byvoorbeeld in Josua 4. Die volk Israel het eindelik in die beloofde land aangekom. Nadat almal op droë grond deur die Jordaan getrek het, moet twaalf manne elkeen ʼn groot klip van die rivierbodem af optel. Hulle moet dit na die oorkant dra. Die klippe word op ʼn hoop gepak. Daar moet dit vir altyd bly lê. As die kinders dan later hulle ouers vra hoe die klippe daar gekom het, dan moet die verhaal van God se hulp en redding  vertel word!

Gedenktekens: moenie vergeet nie! God sorg goed vir ons. En Hy sal dit altyd doen!

Op so ʼn feesdag kyk ʼn mens terug. Wat het alles gebeur in die afgelope jaar, in die tyd wat verby is? Hoe het die bruid en bruidegom vir hulle troudag voorberei? Wat het alles met oupa en ouma in die afgelope veertig jaar gebeur? Op ʼn feesdag kyk ʼn mens ook vorentoe. Wat sal daar in die nuwe jaar en in die toekoms gebeur? Dis glad nie vreemd dat die kamera of videokamera op feesdae uitgehaal word nie. Die feestelikhede word vasgelê: die ballonne, die drukkies, die soene, die geskenke, die vrolike gesigte. Oulik om later weer daarna te kyk. As jy dan deur die foto-albums blaai of na die videos kyk, kan jy saam die herinneringe afstof. As kinders vrae vra oor hoe dinge vroeër was, dan kan jy dit vir hulle wys. Aan die hand van die “prentjies” kan jy dan vertel. “Pappa het darem maar snaaks gelyk in sy troupak! “Ja, jong, dit was toe mode, so ʼn kort baadjie.” “Ek was darem ʼn oulike babatjie!” “Jy is mos nog steeds oulik!” Foto’s en video’s van die ‘gedenktekens’. Om nie te vergeet nie: God sorg goed vir ons!

←⤒🔗

Rituele←⤒🔗

Die gewoontes, die rituele wat hoort by ʼn fees, is iets waarsonder ons nie kan klaarkom nie. Hierdie dinge staan vas en daarsonder kan ʼn mens dit eintlik nie ʼn fees noem nie. ʼn Nuwejaarspartytjie sonder vuurwerke, ʼn verjaardag sonder koek en ballonne, ʼn bruilofsfees sonder toesprake, ʼn huweliksherdenking sonder geskenke, kan mos nie feestelike gebeurtenisse wees nie? Al is die inhoud eintlik die belangrikste, maak die vorm beslis saak!

Die vaste onderdele van ʼn fees gee struktuur daaraan. Dit gee vir kinders vastigheid en ʼn gevoel van veiligheid en geborgenheid. So weet jy presies hoe dinge verloop. As daar maar een klein verskilletjie is met die vorige keer, kom hulle dit dadelik agter. “Hoekom het mamma nie die papegaaislinger opgehang nie?” “Laaskeer mog ek al die kersies op een slag doodgeblaas het…”

Saam vier←⤒🔗

Omdat feesvieringe so ʼn groot rol in kinders se lewens speel, is dit ook baie belangrik vir ʼn kind se ontwikkeling. Daar word op ʼn gereelde basis in hulle lewens feesgevier. Dit behoort gepaard te gaan met aandag, liefde, geselligheid en ʼn gevoel van samesyn. Dit begin al met die voorbereidings vir die feesdag. Daar moet allerhande dinge gedoen word voordat die fees kan begin. Om daaraan saam te werk, bied al baie moontlikhede vir genot. Om saam te beplan wat geëet gaan word, saam koek te bak, saam versierings te maak, uitnodigings te skryf en uit te deel, nuwe klere te koop, ʼn prentjie te teken vir oupa en ouma.

Die ouderdom van die kind bepaal natuurlik ook hoe dinge gedoen word en hoe kinders ʼn fees ervaar. Dit is eintlik redelik maklik om jong kinders tevrede te stel. Vir hulle is alles pragtig. Tieners is baie meer krities. Hulle wil graag help beplan en hulle insette gee. Hulle stel vrae. Daaraan kan jy agterkom wat vir hulle belangrik is. Dit kan jou ʼn paar idees gee.

Hoe ʼn fees ervaar word, hang ook af van die gesin se manier van doen en die karakters van die gesinslede. Die een gesin spandeer meer geld as die ander. Die een ouer is uitbundiger as die ander. Gesinne se manier van feesvier kan baie verskil.

Dankie sê←⤒🔗

Om fees te vier is om te gedenk. Die gedenktekens is daar. Sien jy hulle? Wat beteken hulle? Wie gee vir ons hierdie mooi dae? Ons moet dit nie net gedenk nie, maar ook daarvoor dankie sê! Die Here God dank vir sy versorgende Vaderhand! ʼn Dankgebed tydens ʼn feestelike maaltyd of aan die begin van die dag. Dit mag nie oorgeslaan word nie. Daar kom die gevoel van “ons hoort bymekaar” ook weer sterk na vore.

Juis by die Christelike feesdae mag die dankgebede nie ontbreek nie. Dit is baie besondere gedenktekens! Dit vra vir dankbaarheid vir die heilsdade van ons Vader wat ons op hierdie dae gedenk. Ook dan is daar vaste gewoontes, rituele. Weet die kinders wat dit beteken? Die inhoud is tog belangriker as die vorm? Dit kan jy nie aan die winkelvensters agterkom nie. Dáár is net die vorm, die atmosfeer belangrik. Die ervaring: lekker eetgoed en baie geselligheid op Kersfees en Paasfees. Met musiek en kleure, tekste en simbole wat daarby hoort. Kersvaders en Paashase. Dit het niks met die inhoud te doen nie.

Christelike feesdae word gevier. Op hierdie dae hou die feesviering ook (of juis) verband met rus. Om saam na te dink oor die betekenis van die heilsfeite. Bybel lees. Saam sing. Ja, ook lekker eet, die huis versier en by mekaar kuier. Maar dit is nie die belangrikste nie. Op hierdie dae staan jy met jou kop, jou hart en jou hande stil by God se dade. Jy weet waaroor dit gaan, dit maak jou dankbaar en vol vertroue en jy begin daarmee werk. Jy deel dit. Jy wys dit ook daadwerklik vir ander. Kyk, dit is waarom ons feesvier… God sorg vir ons! Vier dit saam met ons!

Dit geld ook vir die rus waarmee die Sondag gevier word. Dit is ook ʼn feesdag, elke week!

Elke dag feesvier?←⤒🔗

ʼn Feesviering behels nie net pret en plesier nie. Op die dae voor die fees  is ʼn mens gewoonlik baie besig. ‘Is al die nodige inkopies gedoen?’ ‘Is alles gereël?’ Dit verg baie voorbereiding. ʼn Mens kan daarteen opsien om ʼn fees aan te pak. Sommige kinders slaap sleg voor ʼn feesdag. As die dag dan eindelik aanbreek, gedra die kind homself dalk onplesierig op sy eie partytjie. Nukkerig sit hy eenkant. Hy raak aan die huil oor ʼn kleinigheid. Of hy is heeltemal uit sy kassie en sê die ongeskikste goed op die verkeerde oomblik. Soms het kinders te hoë verwagtinge. Dan kan hulle nie anders as om teleurgestel te word nie. En ʼn verjaardag gaan ook verby.

Die geaardheid van die kind speel ook ʼn rol. ʼn Skaam kind kan opsien teen ʼn verjaardagpartytjie. ʼn Kind met ADHD voel dat die normale struktuur van ʼn gewone dag (iets waaraan hy ʼn groot behoefte het) daarmee heen is, al is die feesdag ook hoe goed ingedeel. Alles verloop anders. Dit kan hy of sy nie eintlik hanteer nie. Nee, feesdae is nie altyd vir almal feestelik nie. ʼn Mens kan dit soms uit die oog verloor…

Altyd bly?←⤒🔗

Nie elkeen sal elke fees as feestelik beleef nie. Wat is daar om te vier as jy ernstig siek in die bed lê, as jy so pas ʼn seun of ʼn dogter verloor het, as jy, …ensovoorts. Dan is ʼn feesdag eintlik uit sy plek. Dan maar oorslaan? Jy is nie in die regte bui daarvoor nie. Die gedenktekens maar eenkant toe skuif sonder om iets daarmee te doen? Daar is wel herinneringe. Daar is iets om te gedenk. Die gedenkdag word dan ook op ʼn besondere manier gevier. As pa of ma siek is en een van die kinders verjaar, dan is daar nog steeds iets om voor dankbaar te wees.  Dan kan daar nog steeds versierings, geskenke en ʼn dankgebed wees. Probeer om die mooi dinge te geniet. Want dié is nog steeds daar. Dit sou ondankbaar wees om nie daarvan kennis te neem nie. ʼn Feesdag word dan nie meer net as ʼn gedenkdag gevier nie. Dit word dan op ʼn ander manier gevier. Daar heers ʼn ander stemming. Die gebrokenheid van die lewe word dan duidelik gesien en ervaar. Die lewe op aarde is nie volmaak nie. Ons weet wel: God sorg vir ons. Altyd en onder alle omstandighede. Vir ewig! Die gedenktekens is daar en hulle dui op Hom. Op Hom en op sy bruilofsfees wat gaan kom en wat nooit meer sal ophou nie! ʼn Volmaakte fees. Iets om nou al voor dankbaar te wees. Hoe bly is ons vandag daaroor!