Die woord nuut laat ’n mens se hart sommer vinniger klop. ’n Nuwe ding is altyd mooi, in elk geval mooier as ’n ou ding.

Ons staan aan die begin van ’n nuwe jaar, en tog weet ons dat hierdie jaar nie noodwendig vir ons almal mooier gaan wees as die ou jaar nie. Ons besef dit, omdat ons weet dat ons in ’n stukkende wêreld – en land – leef.

Die Bybel eindig egter met ’n boodskap van vernuwing, nie van vernietiging nie. God maak – uiteindelik – alles nuut. Nuwe mense, nuwe stad, nuwe hemel, nuwe aarde.

Die natuurwetenskap vertel ’n ander – somberder – verhaal. In sy veelbesproke boek “Die Groot Gedagte” (1997) skilder Gideon Joubert dié donker prentjie. Hy weet te vertel dat “oor 5 000 miljoen of 6 000 miljoen jaar sal die uitswellende son die aarde saam met al die planete tot as verbrand” (bl. 175).

Uiteindelik stort die totale geskape werklikheid, waarvan ons die grens nie naastenby kan bereken nie, soos ’n kaartehuis ineen. Die toekoms eindig met niks – of dalk net met energie?

Die Bybel laat ons egter nie in ’n pessimistiese ondergangstemming wegsak nie. Dit laat ons ook nie in ’n oppervlakkige optimisme in die lug sweef nie. Die Bybel is ’n boek van hoop. Dit vertel dat God eenmaal alles nuut maak. Of nee, die Griekse werkwoord wat hier gebruik word, staan in die onvoltooid-teenswoordige tyd, wat beteken dat God tans besig is om alles nuut te maak. Daar is táns al nuwe dinge te sien. “As iemand in Christus bly, is hy ’n nuwe skepsel (skepping); die ou dinge het verbygegaan, kyk, dit het alles nuut geword” (2 Kor 5:17; Gal 6:15).

Gaan die gedaante van hierdie wêreld dan nie verby nie (1 Kor 7:31)? Inderdaad, maar die gedaante van die wêreld gaan verby, nie die wêreld self nie. Is daar dan nie ’n Laaste Oordeel nie (2 Pet 3:12)? Inderdaad, maar die “laaste oordeel” is nie ’n “Groot Vernietiging” nie; God belowe ’n nuwe hemel en ’n nuwe aarde (2 Pet 3:13).

Die aarde het in die dae van Noag deur water “vergaan” sonder om vernietig te word (2 Pet 3:6); so sal hierdie wêreld ook eenmaal in vlamme opgaan, maar sonder om totaal vernietig te word. Ná die groot veldbrand (wêreldbrand) sal alles groen en mooi en volmaak wees. God belowe dit.

Wat is die geheim van die nuwe tyd? Die geheim is: “Die woonplek van God is by die mense” (Openb 21:3). God slaan sy tentpenne onder ons op en Hy woon onder ons soos Hy destyds onder Israel gewoon het toe hulle uit Egipte uitgetrek het. Sy teenwoordigheid en nabyheid sal net veel meer intens en intiem wees. Hy sal alles in/vir almal wees (1 Kor 15:28).

Wat die jaar 2006 vir ons inhou is vir ons onbekend. Ons gaan werk en ontspan, bid en sing, huil en lag, beplan en afrond, elke dag met elke dag se taak. Maar ons doen dit nie soos mense wat in ’n mynskag toegeval is nie; ons doen dit soos mense wat op ’n hoë bergpiek staan en pragtige vergesigte sien. Ons sien reeds in ons stukkende wêreld – en land – iets deurbreek van die koninkryk van God, iets van God se nuwe wêreld, wat ’n wêreld is van vrede en vreugde en geregtigheid (Rom 14:17). En ons weet: op die nuwe aarde is alles nie net mooi en goed en skoon nie, maar ook reg (2 Pet 3:13).

Ons werk en leef soos mense met hoop – hoop op God se Groot Toekoms.