Engele is geskape om God te dien. Hierdie diens, wat hulle in groot getrouheid en met hartlike toewyding verrig, het verskillende onderdele. Een daarvan is om alles wat vyandig teenoor God is, te bestry.

Stryders⤒🔗

God het vyande. Alhoewel Hy enkel goedheid is, het Hy tog vyande. Eerstens in die wêreld van die geeste. Die engele wat van Hom afvallig geword het, wat in duiwels verander het, leef voortdurend in verset teen Hom en teen alles wat Hy doen. As God besig is om dit wat deur die sonde verwoes is, te herstel, sal die duiwel en al sy aanhangers probeer om God se werk teen te staan. As God besig is om sondaars te red, en daarvoor die evangelie laat verkondig, dan doen die “bose geeste in die lug”, soos hulle genoem word (Ef. 6:12), alles in hulle vermoë om dit onmoontlik te maak. Ook as God bestuur uitoefen oor hierdie wêreld, word Hy deur die magte van die duisternis gedwarsboom. Maar in hierdie stryd kan God Hom beroep op sy heilige engele wat as stryders optree. Dit is die sogenaamde apokaliptiese literatuur in die Bybel wat ons hieroor inlig. Veral die boeke van Daniël in die Ou Testament en Openbaring in die Nuwe Testament. Kom ons kyk na twee voorbeelde.

Die stryd in die wêreld van die geeste←⤒🔗

Daniël 10 vertel ons van God se antwoord op Daniël se gebed wat ons kry in hoofstuk 9. Nadat Daniël die gebed gebid het moet hy op reis gaan. Op die reis kom hy naby die Tigrisrivier. Daar verskyn “ʼn man” aan hom. Hy is in wit geklee en dra ʼn goue gordel. Alles is baie indrukwekkend. Daniël skrik. Dit is vir hom duidelik dat hy met ʼn engel te doen het, ʼn bode van God.

Die engel vertel dat hy gekom het om vir Daniël ʼn antwoord te bring. Hy vertel ook waarom hy nie vroeër gekom het nie. Daar het immers een en twintig dae verloop tussen Daniël se gebed en die koms van die bode. ʼn “Engel van die Persiese ryk” het in sy pad gestaan. Eers toe Migael tot sy hulp gekom het, kon hy verder gaan. Migael het toe die stryd teen sy teenstander oorgeneem. Die bode het verder nie baie tyd gehad nie, want hy moes gou teruggaan. Daar wag nog ʼn ander stryd. Eers moes die “engel van Persië” oorwin word, en daarna die “engel van Griekeland”. In al hierdie gevegte sal Migael sy bydrae lewer.

Daar is baie dinge in so ʼn visioen wat nie duidelik is nie. Maar dit is wel duidelik dat hier gepraat word oor die stryd in die wêreld van die geeste. Tussen goeie en slegte geeste. God se engele is aanhoudend betrokke by ʼn worsteling met die duiwels. En die demone het hulle by voorkeur aan die howe van die regeerders gevestig. Daarom word daar gepraat van die “vorste van Persië en Griekeland”. Die duiwel het een van sy demone aan die hof van Persië en een aan die hof van Griekeland gesit om daar, waar daar belangrike besluite geneem word, te probeer invloed uitoefen.

Openbaring 12←⤒🔗

Openbaring 12 is ook ʼn Bybelgedeelte waar ons ʼn idee kan kry van wat in die wêreld van die geeste aan die gang is. Ons kry daar ʼn visioen van dinge wat gebeur het met Jesus se hemelvaart. Toe het daar oorlog in die hemel gekom. Die draak – die duiwel – het alreeds probeer om die geboorte van die Kind te verhoed, maar hy het nie daarin geslaag nie. Die Kind is na God toe weggeneem. Maar die duiwel het nie daarby berus nie. Hy onderneem, saam met sy aanhang uit die hel, ʼn stormloop teen die hemel om Jesus weereens in sy mag te probeer kry. Toe ontmoet die helse leërs die hemelse leërs op die pad. Die leërs onder aanvoering van Michael het die leërs van die duiwel teruggehou. Die duiwel het die stryd verloor. Hy kon die Kind nie in sy mag kry nie. Inteendeel, hy word uit die hemel uitgegooi. Daar is nie langer plek vir hom nie. Hy het nie meer toegang daar nie. Hy kan nie meer daar aankla en beskuldig nie.

Kon hy dit dan voorheen wel doen? Hieroor kan mens nog baie sê, byvoorbeeld wanneer mens Job 1 en Sagaria 3 daarby sou betrek. Maar ons is nie nou besig met die duiwel nie, maar met die engele. Dus laat ons dit nou eers daar, maar dit is beslis interessant.

Daar is ʼn geestelike stryd aan die gang. Dit is vir ons duidelik uit die Bybelgedeeltes. Dit is ʼn stryd waar dit in die eerste plek gaan oor die vraag wie God is en wie regeer. Maar dit gaan ook oor die mens in hierdie stryd. Oorwin die engele of ly hulle ʼn neerlaag? Die antwoord op hierdie vraag is van uiterste belang vir die mens en vir die vraag of die mens kan salig word.

Buitendien, God se kinders het te doen met hierdie booshede. Paulus waarsku daarteen en dring by die gelowiges aan om hulleself te bewapen. Dat hulle die geestelike wapenrusting moet aantrek. Slegs dan sal hulle kan staande bly.

In hierdie stryd stel die Here sy engele tot beskikking van sy volk. Hulle dien nie net vir God nie, maar ook God se volk, vir hulle wat God in sy guns aangeneem het.

Skrifverklaarders←⤒🔗

Laasgenoemde word ook duidelik in nog ʼn taak wat die engele as diensknegte verrig. In die visioen waarin die Here vir Jesaja tot sy diens geroep het, het Jesaja gesien dat die engele ook twee vlerke het waarmee hulle vlieg. Hulle vlieg as hulle ʼn opdrag moet uitvoer. Dit sluit in dat hulle boodskappe moet oordra en dinge moet uitlê. In hierdie werk dien hulle God, maar dit is duidelik dat hulle daarin ook God se kinders dien. Die boodskappe wat die engele moet oordra is vir mense bedoel en is vir hulle belangrik.

God wil sy wil bekendmaak. Van tyd tot tyd openbaar Hy ook van sy heilsplanne. Hiermee maak Hy ook gebruik van sy engele. Hy kan hulle vertrou. Hulle sal getrou wees in die oordra van sy Woord. Hulle is ook bly met dit wat God wil bekendmaak, wat te doen het met die herstel van alles wat deur die sonde verlore is.

Dit was ʼn engel wat vir Sagaria die naggesigte, wat die Here hom laat sien het, uitgelê het (Sag. 1:14; 2:3). Dit was ook ʼn engel wat vir Esegiël ʼn uitleg gegee het – ʼn tolk-engel (bv. Esegiël 40:4; 47:1). In hierdie gevalle kan ons die engele Skrifverklaarders noem. Hulle is mos besig met die uitleg, die verklaring van God se Woord.

Die engel Gabriël tree ook op as Skrifverklaarder in Daniël 8. Daniël het die gesig gesien van die skaapram en die bokram. Die bokram oorwin die skaapram en word baie magtig. Hy slaag met alles wat hy onderneem. Maar Daniël verstaan nie wat dit alles beteken nie. Dan kom Gabriël om vir hom die uitleg te gee. In die hoofstuk daarna is dit weer Gabriël wat met ʼn boodskap uit die hemel kom, waarin hy vertel dat die Here die gebed van Daniël sal verhoor en uitkoms sal gee.

God sorg daarvoor dat ons sy Woord het. Hy sorg ook daarvoor dat ons die uitleg van die Woord ontvang. Ons het mos al twee nodig?

Evangeliste←⤒🔗

Behalwe dat hulle Skrifverklaarders is, is die engele ook evangeliste, iemand wat die goeie boodskap bring. Toe Gideon besoek van ʼn engel ontvang het, het die engel die boodskap gebring dat die Here vir verlossing sal sorg (Rigters 6:11 v). Simson se ouers het deur ʼn engel ʼn soortgelyke boodskap gehoor (Rig. 13:5). En die engel Gabriël van ʼn rukkie gelede kom weer na die aarde toe in die dae van die Nuwe Testament. Hy is ʼn Evangeliebode as hy aan Sagaria verskyn en die geboorte van die Voorloper aankondig (Luk. 1:13 v). Hy is beslis Evangeliebode as hy vir Maria aankondig dat sy die moeder van die beloofde Saligmaker gaan wees (Luk.1:31 v).

Die engele wat by die geboorte, die opstanding en die hemelvaart van die Here Jesus vertel wat daar gebeur het, is almal Evangeliebodes (Luk. 2:10; Mat. 28:5-7; Hand. 1:11). Hulle is predikers van heil. Nee, hulle is nie diensbaar by die verwerwing van die heil nie. Hulle is nie ʼn soort middelaar nie. Om die heil te verwerf is uitsluitlik Christus se werk. Trouens, die toepassing daarvan is ook uitsluitlik Christus se werk, wat dit uitvoer deur middel van sy Gees. Die engele mag wel betrokke wees by die verkondiging van die heil. Alhoewel hier moet ook gesê word dat die werk slegs tydelik aan die engele toevertrou is. Dit het net geduur totdat God se werk ten volle geopenbaar is. Eintlik is hulle taak in hierdie opsig al eerder ingeperk.

Dit merk ons op as ons waarneem dat die engele aktief is by die prediking van die Woord met Kersfees, Paasfees en by die Hemelvaart, maar met Pinkster nie meer nie. Daar neem mense die werk van die engele oor. Dan staan Petrus daar, saam met die ander apostels, en hulle verkondig die groot werke van God. God het in die rigting gewerk. Diensknegte doen die werk totdat die kinders dit by hulle kan oorneem. En dit dra die diensknegte se goedkeuring, want hulle sien dat God besig is om sy doel te bereik.