Die eenheid van die twee nature van Christus is ʼn persoonlike eenheid. Ook dit is deel van die geheimenis van ons Here Jesus Christus.

Wanneer ons sê dat dit ʼn persoonlike eenheid is, bedoel ons in die eerste plek dat Hy net een persoon is. Daar is nie twee Christusse, die een menslik en die ander goddelik nie, maar net een, wat in Bethlehem gebore is, aan die kruis gely en gesterwe het en wat op die derde dag weer opgestaan het.

Ons bedoel ook dat Christus in persoon die eniggebore en ewige Seun van God is. Hy is nie ʼn menslike persoon en ʼn goddelike persoon nie. Hy is die een goddelike ewige persoon wat in ons vlees gekom en ons menslike natuur as sy eie aangeneem het. Hy is ook nie ʼn menslike persoon nie; Hy het ons menslike natuur aangeneem, maar as persoon is Hy die Tweede Persoon in die Drie-eenheid. Dit word dikwels ontken, in besonder deur diegene wat net glo dat Hy goddelik geword het.

Hierdie is die moeilikste deel van die leer aangaande Christus om te verstaan. Dit beteken dat die eersgebore Seun in persoon aan die kruis gely en gesterf het, en dat die persoon wat gesê het “My God, my God, waarom het U My verlaat?” God self was. Wat ʼn ontsaglike waarheid!

Om te sê dat Christus hierdie dinge in, of in ooreenstemming met sy menslike natuur gedoen het, verklaar nie die geheimenis nie, want dit was Hy,die eniggebore en ewige Seun van God, wat dit gedoen het. Hoe onverstaanbaar is die weë van God!

Dit is belangrik om te glo dat Christus persoonlik die Tweede Persoon in die Drie-eenheid is, want net daarom kán Hy vir sondes versoening doen en vir ons ewige geregtigheid bring. Net die Seun van God kon vir al die sondes van sy volk betaal, deur aan die kruis te sterf. Net die Seun van God kon die ewige toorn van God oor die sonde volledig in ses kort ure dra. Net die Seun van God kon vir ons die ewige geregtigheid bring, die geregtigheid van God self (Rom. 3:21, 22), ʼn geregtigheid wat nie tot niet gemaak kan word of verlore gaan nie.

Die werk en sterwe van Christus is vir ons van saligmakende betekenis net omdat Christus persoonlik die Seun van God is. Wat die mens nie kan doen nie, doen God in die persoon van sy Seun.

Dit is ook belangrik dat Christus, die persoonlike Tweede Persoon van die Drie-eenheid, die Een was wat deur die maagd Maria vlees geword het. Op die minste herinner dit ons daaraan dat die wonder van die vleeswording en ons verlossing daarin lê dat God mens geword het, en nie dat die mens God geword het nie.

Al hierdie dinge word met die woorde van 1 Korinthiërs 8:6 mooi opgesom: “tog is daar vir ons maar een God, die Vader uit wie alles is, en ons tot Hom, en een Here Jesus Christus deur wie alles is, en ons deur Hom”. Mag God aan ons die genade gee om hierdie belydenis ons eie te maak en dit as ons belydenis vir altyd te hou.