Gelukkig was dit nou weer Pinkstertyd. Tyd om weer herinner te word aan die Heilige Gees wat as Trooster gekom het (Joh. 16:7). Ons het tog soveel troos in hierdie trooslose wêreld nodig. En nou het ons darem die troos van die Heilige Gees.

Maar met alle respek gesê: Is dit al wat ons aan die Heilige Gees het? 'n Trooster wat troos as dinge skeefloop? 'n Pleister vir die seer? 'n Sieketrooster?

Allermins! As dit die geval was, dan sou geloof in die Heilige Gees inderdaad, soos Karl Marx gesê het, 'n handige opium vir die volk wees, waarmee hulle gepaai kan word sodat hulle bereid sal wees om enigiets te verduur. Daarom is dit belangrik om by onsself uit te maak wat die troos van die Heilige Gees presies inhou.

Die krag van God⤒🔗

Ons moet in gedagte hou dat die Heilige Gees wat as Trooster gestuur is, ook die Krag van God is. In artikel 8 van die Nederlandse Geloofsbelydenis bely ons dat Hy die ewige Krag en Mag is wat van die Vader en die Seun uitgaan. By die uitstorting van die Gees op Pinkster was die skielike geluid van 'n geweldige rukwind uit die hemel 'n bewys daarvan dat dit die Krag van God is wat optree.

Die Heilige Gees is 'n krag met Wie ons moet rekening hou . .. nee, die Krag wat ons hele lewe stuur en rig! Vanuit sy krag moet ons leef. Vanuit sy krag kan ons leef, en lewe ons inderdaad. Daarom is ons getroos deur die Heilige Gees — omdat Hy ons werklik laat lewe.

'n Werklike krag←⤒🔗

Ongelukkig loop die gedagte onder mense rond (ook by onsself) dat die krag van die Heilige Gees net op die terrein van die godsdiens geld en nie werklik 'n faktor in die lewe daarbuite is nie. Maar die Krag van God kan nie ingeperk word nie, ook nie binne die kerkmure nie. God maak self in die Bybel aan ons bekend dat niemand teen sy Krag kan bly staan nie. In Jesaja 40, die bekende hoofstuk waarin die troos vir God se volk afgekondig word, hoor ons (vers 22): “Hy maak die vername mense tot niks; die heersers van die aarde asof hulle nie bestaan nie."

Hoewel die Heilige Gees die Krag van God is waardeur Hy in mense se harte werk en bekering en geloof bring — en watter geweldige krag is dit nie! — moet ons Hom nie as 'n blote geesteskrag beskou nie. Hy doen werklik groot dinge. Toe sy diensknegte Paulus en Silas in die tronk van Filippi vasgeketting was, het Hy 'n groot aardbewing laat kom, sodat die fondamente van die tronk geskud het, die deure oopgegaan en almal se boeie afgeval het (Hand 6:26).

Dit was ook Hy, die Heilige Gees, wat as Krag van God die rots voor die graf oopgebreek en Jesus Christus lewend uit die dood laat opstaan het (Rom.1:4). Lewend uit die dood! Waar wil jy 'n groter krag kry as dit?

'n Mite? 'n Versinsel? Daar is baie mense wat so oor die opstanding uit die dood dink. Ook mense wat as Christene deurgaan, selfs hoogs geleerde teoloë, dink dat die opstanding van Christus 'n saak van onmoontlikheid is - selfs vir die Krag van God. Wie so dink, maak egter 'n geweldige fout!

In 1 Korintiërs 15:17 skryf die apostel Paulus: "As Christus nie opgewek is nie, dan is julle geloof nutteloos, dan is julle nog in julle sondes."

Wie dus die opstanding van Christus betwyfel, noem homself verniet 'n Christen. So iemand is inderwaarheid buite die kring van die gelowiges.

Nie 'n krag om mee te speel nie←⤒🔗

Maar ook ons wat die Heilige Gees as Krag van God bely en erken dat deur sy krag selfs die dood oorwin kan word, moet gedurig daaraan herinner word dat ons nie met sy krag kan speel nie. Ananias en Saffira moes op die harde manier uitvind dat 'n mens nie vir die Heilige Gees durf lieg nie. As waarskuwing vir ons is in Handelinge 5:5 opgeteken hoe hulle voor die voete van die apostels dood neergeval het.

Ananias en Saffira het oor geld gelieg. Maar in die kerk word daar dikwels oor ander dinge vir die Heilige Gees gelieg. Dit gebeur waar iemand voorgee dat hy glo, terwyl hy in sy hart dit wat die Bybel leer, verwerp. Of waar iemand voorgee dat hy die Gereformeerde leer, diens en tug van harte omhels, maar onder die tafel deur daaraan werk om dit te ondermyn. In die ope kan dit nie, want anders verloor ek my (belangrike?) plek in die Gereformeerde Kerk. Vir mense kan ons dalk lieg, maar nie vir die Heilige Gees nie!

Juis daarom kom die Here in die laaste boek van die Bybel, in Openbaring 2 en 3, na sy kerk toe om te waarsku: "Ek het dit teen jou dat jy jou eerste liefde verlaat het" (2:4); "Bekeer jou, anders kom Ek gou na jou toe en sal teen hulle oorlog voer met die swaard van die mond" (2:16); "Jy het die naam dat jy leef maar jy is dood" (3:1); "Omdat jy lou is en nie warm nie, sal Ek jou uit my mond spoeg" (3:16).

Ja, die Heilige Gees is die Krag van God met Wie die kerk - ook ons gereformeerdes - nie durf speel nie. Maar Hy is ook die Krag deur Wie God sy kerk oprig en staande hou. Daarom spoor Hy ons aan, ook in Openbaring 2 en 3: "Wees getrou tot die dood toe (2:10) en: "Hou maar net vas wat julle het, totdat Ek kom" (2:11, 25).

Wie in eerbied voor die Krag van God buig en na sy vermaning luister, besef dat sy geweldige Krag nie vir ons tot verskrikking is nie, maar tot troos. Hy is werklik ons Trooster, gestuur deur Jesus Christus, nie om te paai en aan die slaap te sus nie, maar om die wêreld te oortuig van sonde en geregtigheid en oordeel" (Joh. 16:8).