Is daar engele in die kerk? Hoe weet ons dit? Ons kan hulle immers nie sien nie.

Daar is engele in die kerk, soos ons weet as ons hulle toesing uit Ps. 103:20, en hulle oproep en aanmoedig: “Loof, loof die Heer, o al sy leërmagte, o engele, wat met willige heldekragte die woord volbring wat uitgaan uit sy mond.” Hulle is saam waar die kerk is. Kennis en geloof oor die engele (nie in die engele nie), is bedoel om die geloof in die God wat engele stuur, te verryk en te verdiep onder leiding van die Heilige Gees.

Ons leef in 'n tyd waarin daar hernude belangstelling in engele by kerke wêreldwyd voorkom. Baie boeke verskyn oor engele, oor mense wat engele gesien het, oor engelverskyninge asook die taak en opdrag van die engele. Pragtige boeke, maar ook vreemde boeke.

1. Engele Vandag⤒🔗

Verstandteologie←↰⤒🔗

Daar was 'n tyd toe daar 'n vraagteken geplaas is agter die bestaan van engele.

Ons weet dat ons by geboorte begiftig is met verstand, maar dit is deur die sonde verduister. Ons kan egter nog dink, ons het verstand van die Here gekry en ons moet dit ook gebruik. Die verstand moet wel geheilig word deur die Heilige Gees, maar ons kan dink.

Nou is daar die gevaar dat jou verstand gaan heers oor jou geloof. Dit moet juis omgekeerd wees, jou geloof moet leiding gee aan jou verstand. 'n Paar eeue gelede het daar in die denkwêreld van Wes-Europa 'n verandering gekom: die verstand het meer en meer begin heers oor die geloof. En die geleerdes het gesê dat jy net dit wat jy met jou verstand kan deurgrond, moet glo. Jou verstand sê mens kan nie op water stap nie, dus het Jesus nie op die meer van Galilea oor die water geloop nie. Daar word ook baie wonders in die Bybel beskrywe en jou verstand sê mos dit kán nie wees nie — hoe kan 'n dooie soos Lasarus uit die dood opstaan? Jou verstand sê: Nog nooit het 'n dooie uit die graf opgestaan nie. Dit noem ons die tyd van die rasionalisme, van die verstandteologie, dat die verstand heers oor die geloof.

Toe het ons twee dinge gekry, iets in die agtiende eeu en in die negentiende eeu. Omdat die verstand oor die geloof begin heers het, het die mens die onderskeid tussen engele en mense uitgewis. Hulle sê engele bestaan nie, daar is geen verskil tussen engele en mense nie. Engele is slegs 'n idee.

In die negentiende eeu het dit nog verder gegaan en het hulle ook die onderskeid tussen mense en diere uitgewis. Mense sou van die ape afstam (Darwin).

Maar ons het die merkwaardige dat jy nie slegs 'n verstand en 'n wil gekry het nie, maar ook gevoel. En nou leef ons in 'n tyd dat die gevoel heers oor verstand en wil. En daarom is dit so belangrik dat ons leer hoe om dinge Bybels te benader, en dat ons vertrekpunt neem by die geloof, en ons geloof laat heers oor ons verstand en ons gevoelslewe. Omdat die verstand weer 'n klein bietjie op die agtergrond geskuif het, het daar weer belangstelling gekom in die engele. Want die moderne mens is moeg vir die verstandgodsdiens.

1500 Engelverskynings←↰⤒🔗

Bestaan engele? Ja, want die Bybel sê dit. Ons moet egter versigtig daarmee wees. Daar is 'n mediese doktor in Nederland, dr. Rodenburg, wat 'n advertensie geplaas het in die dagblaaie en gevra het wie 'n engel gesien het? Verder het hy gevra dat daar met hom in verbinding getree moet word, indien dit so was. Daar was 1500 oproepe. Hy maak toe die merkwaardige opmerking: "In 1995 het meer engele in Nederland verskyn as in die hele Bybel." Dit is natuurlik snaaks en daarvoor moet ons versigtig wees, want jy kan jou ook verbeel dat jy 'n engel gesien het. Daarom moet ons slegs na die Bybel luister.

Ons Here Jesus verwys dikwels na engele. In die evangelies is daar 42 verwysings. In Handelinge ontmoet ons 21 keer engele. Paulus praat in sy briewe 28 keer oor engele. En in die laaste Bybelboek, Openbaring, word bykans op elke bladsy van engele gepraat (Verskillende soorte engele — engele van die gemeente, engele voor die troon, ens.).

2. Wat is 'n Engel?←⤒🔗

'n Engel is net soos 'n mens en dier en plant, 'n skepping van God. God het hulle geskape. In Kol. 1:16 staan: "Want in Hom (Christus) is alle dinge geskape wat in die hemele en op die aarde is, wat sienlik en onsienlik is, trone sowel as heerskappye, owerhede en magte." Daar is op aarde dinge geskape maar daar is ook dinge in die hemele geskape. Wat op aarde geskape is, is sienlik, en so sê Paulus, wat in die hemele is, is onsienlik, nl. die trone, heerskappye, owerhede, magte. Daar is dus vier verskillende benaminge vir die engele van God. Hulle bestaan, maar is onsienlik. Sáám met hulle prys ons God die Here en hulle is ook ten dienste van die kerk. Die Hebreërbrief sê dit baie duidelik.

Heb. 1:14 is 'n sleutelteks oor die engele: "Engele is dienende geeste deur God uitgestuur vir hulle wat die saligheid gaan beërwe." As ons gelowiges is en ons gaan die saligheid beërwe, dan staan die engele in ons diens. Hulle is vir ons uitgestuur.

Dienende geeste←↰⤒🔗

Engele is dienende geeste, dus sonder 'n liggaam, wat deur God uitgestuur word. Hulle is in diens van God maar ter wille van die gelowiges, van hulle wat die saligheid gaan kry. Alhoewel engele onsigbaar is, is daar tog mense wat engele gesien het. Die Bybel is vol daarvan.  Abraham het bv. huisbesoek gehad van engele, die ouers van Simson het 'n engel gesien, Sagaria in die tempel het besoek gekry van 'n engel. 'n Engel kan hom dus manifesteer, kan hom sigbaar maak in ‘n menslike gedaante.

Het hy vlerke of nie? Ja en nee. In die algemeen nie, want as hy in menslike gestalte verskyn het hy nie vlerke nie, maar daar is bepaalde engele wat wel vlerke het. Jesaja 6 praat van die gerubs voor die troon met ses vlerke waarmee hulle hulle oë kan bedek, waarmee hulle hulle voete kan bedek en waarmee hulle kan vlieg.

Môresterre←↰⤒🔗

Wanneer is die engele deur God geskape? Daaroor is daar by geleerdes verskil van mening. Sommige sê die engele is geskape voordat die hemel en die aarde geskape is, dus in die begin. Maar ons weet dit nie.

Ons weet wel dat hulle geskape is voor die vierde dag. Dit vind ons in die boek Job (38:7). God vra vir Job waar hy was toe God die fondamente van die aarde waarop die berge rus, neergelê het. Toe was die engele daar en hulle het gestaan en juig. "Toe die môresterre saam gejubel het en die seuns van God gejuig het." Hier word die engele "môresterre" en "seuns van God" genoem. Ons weet nie presies wanneer, maar hulle was reeds daar by die vierde dag van die skepping.

Nou is dit moeilik om die wese van 'n engel te bepaal. Ons kan enigsins 'n aanduiding kry as ons kyk na die betekenis van die woord "engel". Dit beteken "boodskapper" of "bode" of "gesant".

Verder weet ons byvoorbeeld dat hulle ook begiftig is met verstand. (Ps. 103:21). Engele is sterk, begiftig met krag — kragtige helde wat sy Woord volbring (Ps. 103). Hulle is ook begiftig met wysheid. Dit kan ons aflei wanneer 'n groot generaal in die weermag van koning Dawid, Joab, met die koning praat en vir hom sê: "Majesteit, u het die wysheid soos van 'n engel van God” (2 Sam. 14:20).

Engeletaal←↰⤒🔗

Engele kan ook praat. Dit vertel Paulus vir ons in daardie pragtige hooglied oor die liefde (1 Kor. 13). Ons lees in vers 1 van die tale van mense en van engele. Engele het dus ook 'n taal, ons weet nie watter taal en hoe hulle kommunikeer nie. Of dit 'n grammatika is, dit weet ons nie. Maar 'n woordeskat sal hulle ongetwyfeld hê en dit sal verseker 'n pragtig gestruktureerde taal wees. Hulle kan ook aardse tale praat. Ons weet immers van engele wat met mense praat. Dink byvoorbeeld aan Sagaria in die tempel, heelwaarskynlik in Aramees of Hebreeus (die taal van die tempel).  Engele het dus ook ‘n stem — met hulle stem loof hulle God ewig voor die troon.

Die Blydskap van Engele←↰⤒🔗

Engele kan ook bly wees. As 'n gelowige 'n lelike sonde gedoen het en daar is bekering daarvan, dan is die engele bly. So lees ons in Lukas 15.

Ons sou hier miskien ‘n bietjie versigtig moet wees om sterk uitsprake te maak aan die hand van Luk 15. Luk. 15:10 sê: "So sê Ek vir julle is daar blydskap voor die engele van God oor een sondaar wat hom bekeer". Ons kan die teks (in sy oorspronklike taal) ook so lees dat dit nie die engele is wat bly is nie, maar dat dit God Self is wat bly is. Dan word bedoel dat die engele voor God staan en dat daar blydskap van God afstraal voor die engele.

Daar is meningsverskil hieroor, sommige sê hier word die engele bedoel, ander weer sê dat God se blydskap hier bedoel word. Dit kan ook altwee wees. In elk geval is daar blydskap in die hemel as 'n sondaar hom, al is dit maar van een sonde, hartgrondig bekeer.

3. Die Diens van die Engele←⤒🔗

Engele is deur God geskape met 'n opdrag. Hulle het slegs een opdraggewer — dit is God self. Dit tref ons telkens in die Bybel dat engele net dit doen wat God hulle opdra. Dit kan ons volgens die Kategismus van die engele leer. Die Kategismus sê dit so mooi in die gedeelte wat handel oor die gehoorsaamheid aan die wil van God. Dat ons net so gehoorsaam moet wees aan God soos die engele in die hemel. "Sodat elkeen sy amp en beroep net so gewillig en getrou kan uitvoer soos die engele in die hemel" (Sondag 49, vgl. ook Ps. 103:20-21). Die engele is gewillig en getrou, in een woord: werklik gehoorsaam. En so moet ons ook 'n voorbeeld neem aan die engele en net so gewillig en getrou wees. Dit sou natuurlik die duiwel kon insluit, want hy is ook 'n engel, al is hy ‘n gevalle engel. Laat ons maar net in gedagte hou: Hy kom ook elke Sondag kerk toe, hy is baie ywerig — maar ten kwade!

Gewone Diens←↰⤒🔗

Engele het 'n tweevoudige diens. Ons sou dit 'n gewone en 'n buitengewone diens kon noem.

Die gewone diens verrig hulle in die hemel, rondom die troon van God. Dit sien ons byvoorbeeld telkens in die Openbaring van Johannes. Daar is engele rondom die troon wat God dag en nag prys, dien en eer en aanbidding toebring. Daartoe is hulle ook geskape — om die eer, heerlikheid en grootheid van God telkens lofwaardig uit te basuin. Dag en nag loof die miljoene der miljoene engele God die Here.

Engele kan ook bid en aanbid. By hulle is veral die aanbidding in hulle gebedslewe so belangrik, want hulle is juis geskape om God te aanbid. Dit kan ons by hulle leer. As ons na óns gebedslewe kyk, kom ons soms so min uit by die aanbidding en die lofprysing van God. Hulle is egter voortdurend besig om God te loof.

Soms word daar 'n verband gelê tussen die engele en sterre. So sal daar gesê word dat daar net soveel engele is soos die onmeetlike hoeveelheid sterre. Daar is egter geen bewys hiervoor nie. Ons weet slegs dat daar 'n onnoemlike aantal engele is, ontelbaar. Dit is eintlik die enigste ooreenkoms tussen sterre en engele. Dit hou dus ook in dat ‘n mens nie elke engel aan 'n bepaalde ster kan verbind nie en dat elke mens gebind is aan 'n bepaalde beskermengel wat ook weer met 'n ster in verband staan nie. Dit is 'n heidense gedagte wat ons nie kan aanvaar nie.

Buitengewone Diens←↰⤒🔗

Die engele se buitengewone diens is hulle diens op aarde. Ons ontmoet hulle al by die skepping toe die aarde op sy grondveste gestel is. Toe het die engele gejuig en gejubel, God as die Skepper geprys. Maar dadelik na die sondeval staan daar engele by die poort van die paradys met 'n swaard wat vlam en flikker om Adam en Eva voor te keer. By die poorte staan gerubs ('n bepaalde soort engel) om die paradys te bewaak.

Hoekom staan hulle eintlik daar? Was dit 'n strafmaatreël? Nee, dit was 'n besondere genade van God. Hy het die deur van die paradys toegemaak met die gerubyne, want God wil verhoed dat hulle nie weer die paradys instorm en gaan eet van die boom van die lewe nie. Adam en Eva het reeds geëet van die boom van kennis van goed en kwaad. As hulle dit ook nog sou waag om van die boom van die lewe te eet, dan kon hulle nie meer gered word nie. Dan sou hulle ewig in die geestelike dood bly. Daarom het God die gerubyne daar geplaas om te keer dat hulle nie nog hulle hande sal uitsteek na die boom van die lewe nie. 'n Voorbeeld uit die gewone lewe hieroor is: as jy 'n diabeet is, dan is dit gevaarlik om suiker te eet, dit kan dodelik wees. So is dit met Adam en Eva. As hulle nog van die boom van die lewe sou eet, sou dit dodelik wees.

Betrek by Geskiedenis←↰⤒🔗

As ons nou kyk na die ontwikkeling van die heilsgeskiedenis, dan sien ons dat daar by die keerpunte in hierdie geskiedenis dikwels dienstige engele aanwesig is. Dink maar aan die groot gebeurtenis van die geboorte van Christus. Eers is dit 'n engel wat met die herders praat en hulle vertel dat die Saligmaker vir hulle gebore is, Christus die Here, in die stad van Dawid. En dan is daar 'n menigte van engele wat die pragtig 'ere sy God' sing. By die opstanding is daar dan weer engele; by die hemelvaart is daar engele wat praat met die dissipels nadat Jesus opgestyg het. Maar op Pinkster is daar slegs mense. Dus hoe verder die heilsgeskiedenis voortgaan, hoe minder kom daar verskyning van engele voor. Dit wil nie sê dat daar nie nou nog engele kan verskyn nie. Daar is in die geskiedenis van die kerk baie voorbeelde van mense wat engele-verskynings ervaar het, alhoewel 'n mens uiters versigtig daarmee moet wees en baie goed moet toets aan die Skrif.

In sy geheel moet ons dus konkludeer dat, toe die heilsgeskiedenis tot 'n afronding gekom het, die engele-verskynings afgeneem het. God het dit nie meer nodig geag om die engele nog so duidelik te laat optree by allerlei gebeurtenisse in die kerk na Pinkster nie.

Stryd as Diens←↰⤒🔗

As laaste diens is die engele natuurlik ook daar om te stry. So sien ons dit byvoorbeeld in die boek Daniel (10). Hier kry ons ook die interessante verwysing na die feit dat daar ‘n engel van die Persiese volk is. Sou dit kon inhou dat daar ook spesifieke engele verbonde is aan spesifieke volke?

Dit is wel waar dat daar 'n stryd van engele is. Toe Moses begrawe is, het 'n engel ook gekom om Moses se liggaam te beskerm. Hy het gestry met die duiwel (Judas 9). Toe Elia na die hemel gevaar het, was daar ook 'n leërmag van engele wat hom omring het.

4. Bose Engele←⤒🔗

Daar is ook bose engele wat stry teen die gelowiges van God. In die Didage, een van die oudste geskrifte van die apostoliese vaders, sê die skrywers: Elke mens het twee engele, 'n goeie en 'n slegte een. Die goeie wat hom aanspoor om die goeie te doen en dan 'n slegte wat hom aanspoor om die slegte te doen. Dit is nie uit die Bybel moontlik om dit te bewys nie, maar dit is wat deur sommige van die eerste Christene geleer en geglo is.

Paulus praat natuurlik van bose magte in die lug. Engele wat geval het en wat dus ook mense beïnvloed. Kyk maar na die verderflike literatuur wat oor ons uitgestort word! Hoeveel gif, hoeveel venyn word oor die mensdom uitgegiet! Daar is bepaalde musiek, bepaalde popmusiek, wat absoluut demonies is, wat lewensgevaarlik is! Vir jou siel en saligheid moet ‘n mens net nooit eers begin om daarna te luister nie. Ons kan dit alles sien as die invloede en werk van bose engele, demone, wat dit hanteer vanuit die hel — daar waar die duiwel met sy trawante woon.

Val van Engele←↰⤒🔗

Die bose engele beïnvloed die mensdom omdat daar by hulle ook sonde voorkom. In die engele-wêreld het 'n sondeval plaasgevind, soos ook in die mensewêreld. Dit het egter eers in die engele-wêreld plaasgevind. Die duiwel, ook genoem Lucifer, het in opstand gekom teen God. Hy het hoogmoedig geword, hy wou soos God wees. In sy val het hy 'n klomp engele saamgesleep wat dus demone, bose geeste geword het. Nie duiwels nie, want daar is maar net een duiwel. Daar is egter menige bose geeste wat rondom ons is. Paulus praat daarvan in Ef. 6.

Wat is nou die verskil tussen die sondeval van die engele en die van die mense? Dit sê die Bybel duidelik vir ons. Die duiwel en sy engele het uit hulleself gesondig en die mense het gesondig deur verleiding (Gen. 3). Nie dat dit nou 'n minder erge sonde is nie, maar dit is wel 'n sonde van 'n ander karakter. Omdat die mens verlei is deur die duiwel tot sonde en hy daaraan gehoor gegee het, daarom is daar vir die mens verlossing moontlik. God het vir die mens 'n middelaar gestuur, Jesus Christus. 'n Gevalle engel kan nie gered word nie, juis omdat hy uit homself gesondig het.

5. Soorte Engele←⤒🔗

Daar is verskillende soorte engele — spesifiek van daardie engele wat nie in sonde geval het nie. Ons hoor veral van die gerubyne en die serafs.

Gerub←↰⤒🔗

'n Mens kan sê dat die gerubyn 'n vlammewerper is. In die tweede wêreldoorlog het hulle 'n lelike wapen gehad. Hulle het met 'n apparaat vuur gespoeg en daarmee die vyand tegemoet gegaan om 'n oorwinning te behaal. Eintlik beteken die woord "gerubyn" 'n vlammewerper, brander. Hy is vurig, hy is 'n strydengel. Hulle word met 'n vlammende swaard geassosieer. Hy bewaak en beskerm, hy veg en stry ook teen bose magte en beveilig die paradys.

Seraf←↰⤒🔗

Die serafyne is veral die engele rondom God se troon. Daar is 'n verklaring wat sê: Daar is net sewe serafyne. Daar is ook ander name, naamlik magte, trone, heerskappye en owerhede. Sommige het daaruit 'n hele klassifikasie van engele ontwerp, veral 'n sogenaamde pseudo Dionisius. So iets is geweldig interessant, maar ons moet maar baie versigtig daarmee wees. Dit is eerder sinvol om op die eenheid van die engele as op die geweldige onderskeid te wys. Dit is byvoorbeeld ook nie so dat daar as't ware 'n laer soort engel is wat miskien minder begaafd is, minder verstandig en minder wys as 'n ander soort engel is nie. Hulle is almal kragtig, almal wys, almal ywerig en vurig, almal dienende geeste. Maar hulle word wel met verskillende name aangedui in verband met die diens wat hulle moet lewer.

Seuns van God←↰⤒🔗

In die Bybel word engele soms ook aangedui as die "seuns van God" (Job 1:6). In Job hou God 'n vergadering, as't ware 'n kabinetsitting met die engele. En dan is die duiwel ook daarby. In die Ou Testament het die duiwel toegang gehad tot die troon van God.

Manlik of Vroulik←↰⤒🔗

'n Tipiese twintigste-eeuse vraag is: Hoekom word van die engele nie as die dogters van God gepraat nie? Dit bring ons by die vraag of engele manlik is? Of is daar ook vroulike engele? Dit hou verband met die Hebreeuse denke. Die hele atmosfeer van die Ou Testa­ment is meer manlik gerig. Die engele as seuns van God wil sê: Hulle staan eintlik in verbinding met God. Soos 'n seun 'n afstammeling is van sy pa, so kom die engele van God af. In hulle wese is engele egter manlik nog vroulik. Die engele vermeerder of verminder ook nie. Alhoewel daar van miljoene engele gepraat word, is die algemene gedagte dat die getal vasgestel en konstant is. Daarom is dit ook so ‘n vreemde gedagte om te sê: As 'n kind jonk sterwe verander hy en word hy 'n engel.

6. Engele en Mense←⤒🔗

As die engele nou dienende geeste van die mens is, ontstaan die vraag: Is ons meer of minder as engele? Daar was twee groepe godsdienstige mense in Jesus se tyd: Fariseërs en Sadduseërs. Die verskil was dat die Fariseërs geglo het in die opstanding en 'n lewe na die dood. Die Sadduseërs het nie geglo dat daar 'n opstanding is nie. Daarom het die Sadduseërs ook vir Jesus oor hierdie saak probeer vasvang. Hulle vertel vir Jesus van ‘n man wat gesterf het. Sy vrou het volgens die Joodse wet met sy jonger broer getrou. En so was sy nou met sewe broers getroud en toe gaan die vrou ook dood. Nou is die vraag van die Sadduseërs aan Jesus: Watter man gaan nou in die hemel aan hierdie vrou behoort? Jesus vermaan hulle dat hulle nie die Skrif en die krag van God verstaan nie. Want Hy sê: In die hemel word nie meer getrou nie, want mense sal wees soos engele van God. Ons moet goed oplet: Daar staan nie dat hulle engele sal wees nie, maar dat hulle sal wees soos die engele van God. Dit beteken dat hulle nie getroud sal wees nie. Daar is immers geen manlike en vroulike engele nie. Dus sal daar in die hemel geen huwelike meer wees nie. Daar sal wel broeders en susters in die hemel wees, maar nie meer man en vrou wat getroud is nie.

Ps. 8 sê dat die engele meer is as mense. Want daar staan: God het die mens 'n weinig minder gemaak as die engele. Wat bedoel die digter met "'n weinig minder"? Wat is die voordeel van die engele wat ons nie het nie? Hulle sien God direk. Hulle is rondom die troon van God en sien Hom van aangesig tot aangesig. Ons sien God net in die geloof, nog nie in aanskouing nie. Dit is wat die digter sien as die engele se geweldige voordeel bo die mense. Hulle is nou al in verbinding met die troon van God! In so verre is ons minder as die engele.

Aan die ander kant is ons meer as engele. Petrus wys op die misterie van die versoening, die wonderwerk van Christus aan die kruis, wat op die versoendeksel uitgebeeld is in die tabernakel. Die gerubs kyk ook na die versoendeksel. En Petrus sê dat daardie engele nuuskierig is, hulle is begerig om daarin te kyk. Maar hulle kan dit met al hulle verstand en wysheid nie navors nie, want versoening is iets vir die mense en nie vir die engele nie. En in soverre is die mense weer meer as die engele.

Om egter in die hemele van min en meer te praat is ons insiens ietwat moeilik. As ‘n mens van “minder” praat, praat jy al gou in ons terme van iets onvolkome, en tog is alles volkome in die hemel. Mens kan miskien liewers sê: anders. 'n Engel is 'n ander skepsel as 'n mens; dus sien hy God op 'n ander wyse en hulle sal ook op ‘n ander wyse saam met ons in die hemel funksioneer.

7. Wat Doen die Engele?←⤒🔗

In Ps. 91:10-11 vind ons dat God sy engele bevel gee om ons te bewaar: "Geen onheil sal jou tref en geen plaag naby jou tent kom nie; want Hy sal sy engele aangaande jou bevel gee om jou te bewaar op al jou weë".

Ten eerste word gesê dat die engele onder God se bevel is. God stuur hulle om die gelowige kinders van die Here te beskerm. Ons weet dat die engele daar is waar die gelowiges bymekaar is. Maar op watter ander plekke kan ons die engele ook nog verwag?

Engelediens in die Hemel←↰⤒🔗

Natuurlik op die belangrikste plek — dit is rondom die troon van God om Hom te loof en te prys. Daar is miljoene engele rondom die troon. In Open. 8:2 word gepraat van sewe engele voor die troon van God. Sewe is die getal van volheid.

Omdat ons in die Skrif somtyds met engele-name gekonfronteer word, is dit tog ‘n vraag of daar miskien ook ‘n spesifieke sewe engele is. Die tradisie noem ten eerste Gabriël, wat ons ontmoet by die kersgeskiedenis, waar hy die geboorte van Christus aankondig aan Maria. Sy naam eindig op "-el". Nou is daar ook ses ander engele, aldus die tradisie. In 'n apokriewe boek, Tobias, (wat geskryf is nadat die Bybel alreeds afgesluit was) staan name van die ander engele, onder andere: Uriel, Raguel, Reuel, Rasuel (ook Samel genoem). Dit kom nie uit die Bybel nie, maar merkwaardig dat al die name op "-el" eindig. Dit beteken "God".

Migael beteken "wie is soos God" en die ander bekende engel Gabriel se naam beteken "hy is die sterke of krag van God". Hy is die boodskapper van God. Migael ontmoet ons in die boek Daniel waar hy met 'n demoon — dit kan ook die duiwel wees — stry. Migael is dus 'n strydengel. Ook in Judas (vers 9) lees ons van Migael se stryd met die duiwel oor Moses se liggaam. Ons lees nêrens van hierdie geskiedenis in die Ou Testament nie. Hoekom wil die duiwel Moses se dooie liggaam hê? Moses is dood en sy liggaam moet nou tot ontbinding oorgaan, maar Migael word deur die Here gestuur sodat die liggaam van Moses bewaar kan bly sodat hy op die berg van verheerliking saam met Elia (wat ook die doodsontbinding vrygespring het) en Christus kan verskyn. En hieroor moes Moses se liggaam bewaar word en het Migael gesorg dat die duiwel geen vat kry op die liggaam van Moses nie.

Ons kry Migael ook in Open. 12:7 na die hemelvaart. Daar is oorlog in die hemel. Daar stry Migael en sy engele teen die draak en sy engele. En dan word die draak, die duiwel, uit die hemel uitgegooi. Met ander woorde, nie net die engele nie, maar ook die draak (die duiwel) en sy aanhangers het toegang gehad tot die troon van God. Migael en sy engele het die stryd gewen en die duiwel is op die aarde neergewerp (alhoewel die duiwel wederregtelik sê dat hy na die aarde neergedaal het).

Behalwe die sewe engele word daar ook nog in die Bybel (Thess. en Open.) gepraat van die aartsengel. Dit is ook 'n vername engel en waarskynlik Migael, maar daar is nie sekerheid hieroor nie.

Engelediens op die Aarde←↰⤒🔗

In die tweede plek is die engele ook op die aarde. Hulle was daar by die geboorte van Christus. 'n Menigte van engele, wat behalwe veg, ook kan bid, aanbid en kan sing. Soos ons gesê het, het die engele moontlik ‘n eie taal. Paulus praat selfs van die meervoud, nl. "die tale van engele" (1 Kor. 13). Of daar dus verskillende engeletale is, weet ons nie, maar dat engele kan bid en sing, maak die Bybel baie duidelik.

Engelediens in die Kerk←↰⤒🔗

Derdens is die engele ook in die kerk, by die gemeente van God. As die gemeente bymekaar kom in die erediens, dan is die engele ook daar. Wie kan nou nog sê dat die kerkgang nie belangrik is nie?

In Heb. 12:22 word beskryf wat die erediens is: "Maar julle het gekom by die berg Sion en die stad van die lewende God, die hemelse Jerusalem en tienduisende engele, by die feestelike vergadering en die gemeentes van eersgeborenes wat in die hemele opgeskrywe is..." 'n Erediens is dat jy saam met die engele bymekaarkom as 'n gemeente wat genoem word die hemelse Jerusalem. As ons dus kerk toe gaan, kan ons verseker weet die engele gaan ook daar wees.

Trouens, die engele is in die kerk spesifiek om na die vrouens te kyk. Die merkwaardige feit vind ons in 1 Kor. 11:10: "Daarom moet die vrou 'n aanduiding van gesag op die hoof hê ter wille van die engele". Letterlik staan daar: die vrou moet 'n "mag" ("eksousia" in die Grieks) op haar hoof hê. Die vrou moet in die erediens 'n aanduiding gee dat sy haar man gehoorsaam is. En dan het die apostel bepaalde vroue in die oog. 1 Kor. 11:5: "maar elke vrou wat bid of profeteer met onbedekte hoof, doen haar hoof oneer aan; want dit is een en dieselfde asof haar hoof geskeer is". Dit gaan oor vrouens wat bid en profeteer. Dan kyk die engele of jy by die vrou kan sien of dit 'n vrou is wat God se ordening wil gehoorsaam. Christus, die hoof van die man, die man die hoof van die vrou. Engele kyk daarna of die vrou dit wil eerbiedig. Engele kyk na die vroue, want daar moet orde, eenheid en gesag, asook die erkenning van gesag in die gemeente van Christus wees. Daarom moet die vrou 'n aanduiding van gesag op die hoof hê, ter wille van die engele.

Engelediens vir die Gelowiges←↰⤒🔗

Vierdens is die engele ook by elke gelowige individueel. Heb. 1:14: "Engele is dienende geeste, ter wille van hulle wat die saligheid gaan beërwe”. Gelowige kinders van die Here wat op pad is na die ewige heerlikheid, mag weet engele is in hulle diens. Soos huisbediendes het God ook engele uitgestuur om die gelowiges te bedien.

Verder is engele ook teenwoordig as Christus terugkom. Hy kom terug as't ware omring deur tienduisende der tienduisende engele.

Die engele is dus in die hemel, op aarde, in die kerk en by ons persoonlik waar ons beweeg.

Opsommend: Die Taak van die Engele←↰⤒🔗

Om op te som kan ons dus die volgende opmerk: Die engele het basies drie opdragte.

Eerstens is hulle primêre taak om God te loof en te prys. Ons is ook geskape om God te loof en te prys (vgl. die Westminster konfessie art 1).

Tweedens is hulle geroep om te stry. Ons stryd is ook teen die bose magte in die lug (Ef. 6) en die engele staan ons daarin by. Hulle kan die bose magte nog beter identifiseer as ons en stry ook teen die bose magte in die lug.

En dan is engele ook daar om ons te beskerm.

Beskermengele?←↰⤒🔗

Kortliks nog iets oor die belangrike vraag of alle gelowiges dan 'n beskermengel het. Die antwoord is ja en nee. Pastoor Hermas uit die na-apostoliese tyd het 'n boek geskrywe. Hy sê: Elke mens het 'n goeie en slegte engel. Die Roomse kerk, wat baie maak van engele (ons kan dit in hulle kerklike argitektuur sien, tans trouens ook op baie orrels in die protestantse kerke met engelfigure), glo ook dat elke mens 'n beskermengel het. Die beskermengel word ook aanbid. Hulle glo jy kan hom direk aanroep om sy hulp in te roep. Maar dit sê die Bybel nêrens nie. Ons mag immers slegs tot God bid?

Daar is egter ook Gereformeerdes (Sangius, Revetus, ook Luther) wat glo dat elke mens sy eie beskermengel het. Calvyn verwerp die gedagte dat elke mens 'n beskermengel het. Calvyn sê: As jy van 'n beskermengel praat dan dink jy te min van God. Daar is baie engele rondom die gelowiges. Die idee dat elke mens 'n beskermengel het, word veral gesoek in die lig van Matt. 18:10 waar die Here Jesus sê: "Pas op dat julle nie een van hierdie kleintjies verag nie; want Ek sê vir julle dat hulle engele in die hemele altyd die aangesig sien van my Vader wat in die hemele is". (Die kleintjies kan hier kindertjies en kleingelowiges wees). Maar in hierdie gedeelte is dit duidelik dat daar van ‘n meervoud van engele gepraat word. Daar is dus meer as een engel wat die kind bewaar en beskerm. So lees ons ook by Luk. 16:22 dat Lasarus weggedra is deur engele na die boesem van Abraham. Ook daar is engele in die meervoud. As ons dus van een enkele beskermengel praat, dan dink ons te min van God se bewakingsdiens. Daar is engele (meervoud!) wat ons omring, bewaar en beskerm. Dit is 'n heerlike troosvolle gedagte vir die gelowige.