Glo u dat alle dinge vooraf deur God bepaal is? As dit nie so is nie, waarom gebeur dinge? Ons wil graag hierdie vrae onder die hieropvolgende hoofde aanspreek.

Ons wil graag aantoon dat die Bybel leer dat God alle dinge vooraf bepaal het. Die Bybel leer dit deur te praat van God se besluite.

Die besluite van God is sy vrymagtige, ewige bepaling van alle dinge wat is, wat was en wat sal wees — in die skepping, in die geskiedenis en in saligmaking. Die Bybel gebruik die volgende woorde om die besluite aan ons mee te deel:

 Sy raad (Ps. 73:24; Ef. 1:11), wat benadruk dat die besluite beraadslagings en voornemens van al drie die persone in die Drie-eenheid is

Sy voorneme (Jes. 14:24-27; Ef. 3:11), wat toon dat God se besluite nie willekeurig is nie, maar dat hulle almal sy glorie ten doel het.

Sy welbehae (Jes. 44:28; Luk. 12:32), wat beklemtoon dat God se besluite nie van enigiemand of enigiets anders as Homself afhang nie, selfs nie van sy voorkennis van die dade van die mens of ander skepsele nie. Sy besluite is vrymagtig en onafhanklik. Hy besluit alle dinge omdat dit Hom behaag om dit te doen.

Sy wil (Rom. 1:10; Ef. 1:5), wat toon dat sy besluite nie die blote noodlot is nie, maar die gedagtes van die hart van die lewende God.

Sy bepalings ( Luk. 22:22), wat die belangrike waarheid, dat God se besluite vas en onveranderlik is, beklemtoon.

Sy besluit (Ps. 2:7), wat ons daaraan herinner dat Hy alle dinge as die groot Koning, die soewereine Skepper en Heer van hemel en aarde, gemaak het.

 Die blote aantal woorde wat God se besluite beskryf, wys al hoe belangrik hulle is. As ons enige hoop of vrede in hierdie bose en gekwelde wêreld wil hê, is dit baie belangrik dat ons dié woorde sal begryp.

Om te glo dat God alle dinge vooraf bepaal en verordineer het is die grootste troos wat ʼn mens kan hê. Dan kan ons weet dat dinge nie per toeval of noodlot gebeur nie, maar deur die besluite van Hom wat goed en alwys is. Dan hoef ons nie te dink dat daar ʼn ander mag — ʼn bose mag — is wat baie van wat in ons lewe en in die geskiedenis gebeur, bepaal nie. Dit sou ons sonder hoop of vrede laat.

 Om egter troos te kan put uit die waarheid dat God alle dinge bepaal, moet ʼn mens oortuig wees dat God wys en goed is, en die genade en barmhartigheid van God ken. Dit is alleen moontlik deur geloof in Jesus Christus. Hy is die krag en wysheid van God (1 Kor. 1:24). Om God deur Hom te ken, is om seker te wees dat God goed is.