⤒🔗

Waar Vind ons Beskutting?←⤒🔗

In tye van swaarkry, wanneer teleurstellings ons deel geword het, in tye van droefheid en rousmart is ons nie alleen geneig om moedeloos, verslae of geheel apaties te word nie, daar is ook nog ander gevare wat ons bedreig. Daar is die gevaar om opstandig te word. Ons voel veronreg. Waarom moes dit met my gebeur? Is God wel regverdig? 'n Ander gevaar is dat ons onveilig voel. Ons voel eensaam en verlate, onbeskut en onbeskermd. Wie sal nog na my omsien? Ons geloof dreig om skipbreuk te ly.

Christene wat Swaarkry←⤒🔗

Petrus skryf sy eerste brief aan Christene wat onder swaar druk verkeer en wat vervolging om Christus ontwil in die gesig staar. Hulle dreig om moedeloos en selfs opstandig te word. Hulle voel onveilig en van alle kante bedreig. Ons moet goed daarop let hoe die apostel hierdie mense in hul noodsituasie tegemoettree. Hy wys hulle op die kragtige hand van God. "Verneder julle dan onder die kragtige hand van God, sodat Hy julle kan verhoog op die regte tyd" (1 Pet. 5:6).

Die Kragtige Hand van God←⤒🔗

Met die kragtige hand van God bedoel die apostel hier God se raadsbestuur. Hy lei en bestuur alle dinge. Ook die vervolging wat die eerste lesers van Petrus se brief moes verduur, geskied nie buite God se beskikking nie. Wat die vyande van die Evangelie hulle ook al laat ly, God se hand staan daar nie buite nie. Agter die hand van die vyand is die hand van God. Die Here het dit toegelaat, Hy het dit beskik oor sy kerk in daardie tyd. Hy ag dit nodig en Hy bestuur dit. God se hand is 'n kragtige hand. Hy regeer en Hy doen dit met gesag en met groot krag.

Hoekom skrywe Petrus op hierdie manier oor vervolging en druk? Hy doen dit sodat sy lesers, en met name die eerste lesers, as vervolgde Christene sal insien dat hulle in hul swaarkry, in hulle lyding – want die lydingsmotief is baie prominent in Petrus se brief – sal glo dat hulle nie maar net met hulle vervolgers te doen het nie, maar ook met God wat alles bestuur en lei. Dit geld ook vir ons. Ons moet ook leer glo dat alles wat ons in ons lewe wedervaar nie by toeval gebeur nie. Ook agter al daardie teleurstellings, agter ons verdriet, ons smart moet ons leer om die hand van die Here, die kragtige hand van ons God te sien. Hy is die Beskikker van ons lot. Agter 'n dierbare wat ons ontneem is, moet ons die hand van die Here sien. Daardie teenslae wat ons moes verduur, gaan nie buite God se heilige wil om nie.

Verneder Julle←⤒🔗

Die opdrag wat Petrus aan sy lesers en ook aan ons gee, is om ons te verneder onder die kragtige hand van God. Om te verneder beteken om diep te buig, om te buk onder daardie kragtige hand van God. Ons moet ootmoedig buig onder God se leiding met ons lewe. Hoe belangrik is dit nie om gelowig te erken, dat alles wat ons in die lewe ondervind, deur die Here oor ons beskik is? Niks gebeur in ons lewe by toeval nie. In tye van voorspoed wil ons graag aanvaar, dat die Here dit oor ons beskik het, maar wanneer ons lewenspad afbuig na die diepte dan is dit moeilik om God se hand daarin te sien. Maar daar kom rus in ons gemoed, daar kom vrede in ons hart, wanneer ons by daardie punt gekom het. Wanneer ons gelowig en ootmoedig buig onder God se leiding en bestuur sal die storm in ons binneste bedaar en dit maak dat al die vrae, die waaroms, nie meer deur ons gedagtes maal nie.

Die Verhoging←⤒🔗

Wat gebeur wanneer ons gelowig buk onder daardie kragtige hand van God, wanneer ons aanvaar en bely, dat die Here ook daardie lyding oor ons lewe laat kom het? Petrus sê: "Hy sal julle verhoog". Maar die Here kan en wil dit alleen doen wanneer ons onsself onder sy hand verneder. Die woordjie "sodat" in 1 Pet. 5:6 is baie belangrik. Verhoging wil hier sê opheffing. Die Here sal ons optel uit ons ellende. Hy sal ons weer nuwe vreugde gee, 'n nuwe lied in ons mond.

Op die Regte Tyd←⤒🔗

Wanneer doen die Here dit? Nie op ons tyd nie, maar op sy tyd. Letterlik skryf Petrus: op die regte moment. Dit is God se tyd, sy geleentheid. Hy bepaal dit in sy wysheid. Ons moet leer om daar gelowig op te wag. Wanneer ons met alles wat ons moet deurmaak onder God se kragtige hand kom, dan sal ons ondervind dat dit goed is om daar te vertoef. Naby die Here, onder sy heilryke, kragtige hand kry ons lewe met al sy vrae, sy verdriet en eensaamheid nuwe perspektief.