Vir baie mense van ons tyd, ook kerk­mense, is dit vreemde taal! Want wanneer Paulus só jubel, blyk dit uit die verband dat hy onder 'alles' ver­staan: vernedering, hongerly, ge­brek en smarte. Ons kan al die kruise wat Paulus moes dra, saamvat in die één woordjie 'alles':

• Sy eerste kruis was die kruis om mens-te-wees. Sedert die sonde in die wêreld gekom het, het elke mens 'n kruis waaronder hy gebuk moet gaan.

* Klaagliedere praat van: die kruis wat die jeug moet dra
* Prediker van: die kruis van die ouderdom
* Die Huweliksformulier van: die kruis van die getroudes.

Ja, uit ondervinding weet ons dat daar geen huis sonder 'n kruis, en geen hart sonder smart is nie.

• Die tweede kruis wat Paulus moes dra, was die kruis van Chris­ten-te-wees. Jesus self het gesê:

As iemand agter My aan wil kom, moet hy homself verloën en sy kruis opneem en My volg.Matteus 16:24

Hierdie woor­de van die Here Jesus verwys na die kruis van veragting en bespotting wat die wêreld vir die Christen het as hy nie wil meedoen nie. Dit sien egter ook op die kruis van beproe­wing wat die Here gebruik om die Christen in sy geloof te louter. Ja, ons moet deur baie verdrukkinge heen in die koninkryk van God in­gaan (Handelinge 14:22).

• Die derde kruis wat Paulus moes dra, was die kruis van apostel-te­-wees. Toe Jesus vir Paulus geroep het, het Hy aan Ananías gesê: "Want Ek sal hom toon hoeveel hy vir my Naam moet ly" (Handelinge 9:16). En hoe ter­deë het Paulus nie ondervind wat dit beteken om vir die evangelie te ly nie!

Die vraag is nou: hóé het Paulus hierdie kruise gedra? Want hy sê: "Ek is tot alles in staat". Met ander woorde, hy kan die kruise dra.

'n Mens kan jou kruis egter op so baie maniere dra… Jy kan dit murmurerend dra soos die Israeliete in die woestyn. Of jy kan dit on­aandoenlik soos die Stoïsyne dra. Jy kan dit ligsinnig soos die Epikureërs dra: "…laat ons dan eet en drink, want môre sterf ons!" (1 Korintiërs 15:32). Jy kan die tugtiging van die Here ge­ring ag óf daaronder beswyk (Hebreërs 12:5).

Is dit hoe Paulus sý kruise gedra het? Nee! Aan die Romeine skryf hy: "Ons roem in die verdrukking". Aan die Korinthiërs skryf hy: "Daarom gee ons nie moed op nie". Toe hy en Silas in die tronk sit, sing hulle lofliedere in die nag!

Wat was die geheim van Paulus se optrede?

Hy sê: "Ek is tot alles in staat deur Christus wat my krag gee!"

Jesus Christus was die geheim van Paulus se krag. Die woord in die oorspronklike taal dui aan dat Christus hom nie slegs eenkeer in staat gestel het om sy kruis te dra nie, maar voortdurend! Jesus Christus was vir Paulus die lewende Heiland met wie hy in voortdurende gemeenskap gestaan het. Hy het Jesus nie net as Here-in-die-hemel geken, wat aan hom verskyn het nie — 'n Christus ver bó hom — maar as Here wat deur sy Heilige Gees in hom gewoon het. En net soos die wingerdstok voortdurend die sap in die ranke inpers, so het die Heilige Gees voortdurend die krag van Christus in Paulus ingepers. Geen wonder nie dat Paulus aan die Galasiërs kon skryf:

Ek leef nie meer nie, maar Christus leef in my!Galasiërs 2:20

Ons moet egter nie dink dat Pau­lus 'n supermens was nie. Hy was 'n doodgewone mens soos u en ek, wat óók moes kla:

Die goeie wat ek wil, doen ek nie, maar die kwaad wat ek nie wil nie, dit doen ek!Romeine 7:19

U en ek is óók tot alles in staat deur Christus wat ons krag gee. In die weg van die geloof, van die ge­troue lees en bestudering van die Woord van God, in die weg van die gebed waardeur ons begeertes met danksegging bekend word by God (Filippense 4:6), en in die weg van 'n tere, Godvresende lewenswandel, ontvang ons die krag van die Heilige Gees, sodat ook óns elkeen jubelend kan uitroep:

Ek is tot alles in staat deur Christus wat my krag gee!