Die Bybel se leer van die Drie-eenheid is seker die belangrikste leer, maar ook die leer wat die minste na waarde geskat word. Die meeste gelowiges verstaan dat hierdie leer die Christendom van al die heidense godsdienste en die sektes onderskei, maar besef nie die waarde daarvan nie. Dit lyk vir hulle asof dit min met hulle lewe en geloofsekerheid te doen kan hê.

 Ons wil graag duidelik stel dat die leer van die Drie-eenheid van die grootste moontlike belang vir gelowiges is. Om die Vader, die Seun en die Heilige Gees te ken, is om God te ken. Om God te ken, is die ewige lewe (Joh. 17:3).

Kom ons maak seker dat ons hierdie leer verstaan, waarna ons die opsigte waarin dit vir ons waardevol is, sal verduidelik. Eerstens moet ons weet dat geloof in die Drie-eenheid nie politeïsme, ʼn geloof in drie gode, is nie. Sektes soos die Jehova-getuies en vals godsdienste soos Islam sê dat Christene in drie gode glo. Hulle is verkeerd. Ons glo dat die Here ons God een Here is (Deut. 6:4). Die woord Drie-eenheid self beklemtoon dit.

 Ons glo, volgens die leer van die Skrif, dat daar  in God drie persone is: Die Vader, die Seun en die Heilige Gees. Hulle is inderdaad drie persone – afsonderlike en individuele persoonlikhede met verskillende name, Vader, Seun en Heilige Gees – name wat hulle persoonlike kenmerke weerspieël.

Baie mense wat daarop aanspraak maak dat hulle aan die Drie-eenheid glo, ontken inderwaarheid dat die Vader, die Seun en die Heilige Gees drie werklike persone is. Sommiges praat byvoorbeeld van die Heilige Gees nie as ʼn persoon nie,  maar as ʼn krag wat gemanipuleer en gebruik kan word. Ander hang ʼn “eenheidsleer” aan wat baie Bybels klink, maar wat inderwaarheid ʼn ontkenning van die Drie-eenheid is. Ingevolge hierdie valse leer is Vader, Seun en Heilige Gees net verskillende ampte, name of wyses waarin die een God Homself openbaar. Hierdie leer is reeds in die vroeë geskiedenis van die Nuwe Testamentiese kerk veroordeel. Dit is destyds monargianisme of Sabellianisme genoem.

In teenstelling hiermee skryf die Bybel al die kenmerke van ware persone aan die Vader, aan die Seun en aan die Heilige Gees toe, terwyl dit ook beklemtoon dat hulle almal een God is. Hulle is nie bloot name of kragte of werke van God nie. As hulle nie werklik persone is nie, is alles wat ons van Jesus Christus glo tevergeefs, en het ons nie ʼn persoon in die Drie-eenheid wat ons sondige natuur aangeneem het om in ons plek te staan, ons sondes as sy eie op Hom te neem, vir ons te sterf, vir ons verlossing te bewerk en vir ons by die Vader in te tree nie. Ook het ons dan nie die persoon van die Heilige Gees om in ons harte te leef en ons in hegte, persoonlike verhouding met God te bring nie. Ons belydenis van die Drie-eenheid is daarom die belydenis van Psalm 48: 14: “dat hierdie God onse God is, vir ewig en altyd; Hy sal ons lei tot die dood toe”.