Dat God se voorsienigheid oor alle dinge op die aarde, in die hemel en die hel strek, moet so sterk moontlik beklemtoon word. Dit is ʼn ander manier van sê dat God soewerein is. Die skrif leer dat Hy soewerein regeer oor:

• Engele (Ps. 103:20, 21).
• Duiwels (Job 1:12; Job 2:6).
• Alle mense (Jer. 10:23; Hand. 17:28).
• Die hart van die mens (Spr. 21:1).
• Die handel van die mens (Spr. 16:9).
• Die gedagtes en woorde van die mens (Spr. 16:1¹).
• Die sonde van alle mense (Ps. 33:10; Spr. 16:4; Amos 3:6; Hand. 2:23).
• Die sonde van sy eie volk (Jes. 63:17).
• Die verharding van die mens se hart in die sonde (Eks. 4:21; Rom. 9:18).
• Die seisoene en die weer (Hand. 14:17).
• Die sterre en planete (Ps. 104:19).
• Die groot dinge in die skepping (Jer. 5:24; Dan. 4:35).
• Die kleinste en mees onbeduidende dingetjies (Matt. 10:29, 30).
• Sogenaamde natuurrampe en onaangename gebeure (Ps. 105:29; Ps. 148:8).
• Oorlog en vrede (Jes. 45:7²)
• Lewe en dood (Gen. 4:1; Ps. 31:15; Ps. 104:28, 29).
• Alle dinge (Ps. 103:19).

God se voorsienigheid is egter nie net sy regering nie. Laat ons nie vergeet dat Hy alle dinge laat gebeur, hulle stuur en bestuur, en alles gebruik om sy eie voorneme en welbehae uit te voer (Eks. 3:19, 20; Jes. 44:28; Jes. 46:9; Ef. 1:5; Fil. 2:13).

Dit is beide die misterie en die wonder van voorsienigheid. Dit is ʼn geheimenis dat God alle dinge, insluitende die bose en hulle wat boosheid werk, gebruik sonder om self vir die boosheid verantwoordelik te wees. Dit is ʼn wonder van genade dat hy soewerein alle dinge vir die saligheid van dié wat aan Hom behoort, en ten goede van dié wat Hom liefhet en volgens sy voorneme geroep is, gebruik. Hy doen dit ter wille van Christus wat gely het, gesterf het en weer opgestaan het vir die sondes van sy volk.