Jy vra seker die vraag omdat jou ouers meen dat jy dit nie mag doen nie en jy dink weer dat jy dit wel mag doen? Ek kan nie skeidsregter speel nie. Ek weet wel dat dit altyd goed is om jou ouers te gehoorsaam. Jy is ook daartoe verplig deur die vyfde gebod.

Dit is nie ʼn nuwe probleem nie. Die Here Jesus het juis met die Fariseërs oor die Sabbatsviering gebots. Lees Markus 2:23 en 3:6. Die Fariseërs het ongeveer 1500 reëls in verband met die Sabbat gemaak. Dit was vir ʼn goeie doel. Hulle wou die Sabbat beskerm. Hulle het egter te ver gegaan.

Een Sabbatdag gaan die Here Jesus na die sinagoge toe. Daar tref Hy ʼn man met ʼn verdorde hand aan. Die Fariseërs hou die Here Jesus fyn dop. Wat sal Hy doen? Uitdagend sê Jesus vir die man met die verdorde hand: Staan op. Hy vra of dit geoorloof is om op die Sabbat goed of kwaad te doen. Om ʼn lewe te red of dood te maak? Daarop sê Jesus vir die man: Steek jou hand uit. Die Here Jesus werp daarmee lig op die betekenis van die Sabbat. Ons is nie daar ter wille van die Sabbat nie. Ons moet nie gebuk gaan onder die las van 1500 reëls nie. Volgens die rabbyne was dit selfs nie geoorloof om ʼn wond te verbind nie. Die Sondag is ʼn dag van rus en verlossing. ʼn Dag om te geniet.

Die Sabbatsgebod gryp terug na die Skepping. God het op die sewende dag gerus om sy Skepping te geniet. God het vir ons hierdie dag uitgesonder, sodat ons kan geniet van sy verlossingswerk in sy Seun die Here Jesus.

Ons kry elke week ʼn vakansiedag. Ons hoef nie sewe dae te werk nie. Die Sondag is ʼn dag om God se werk te geniet. Dit is ʼn dag waarop jou skooltas maar kan toe bly. ʼn Dag waarop jou ma nie hoef te stryk nie. In Israel moes hulle selfs in die besige oestyd op die sewende dag rus. Die werk het bly lê. Hulle moes rus. Rus is nie ʼn straf nie, maar ʼn seën. Hulle mog God geniet en Hom dien. Die Here sê: Rus uit en geniet My.

Wil jy dit doen? Verskaf dit jou vreugde? Kan jy vir jouself voorstel wat dit beteken om God te geniet? Om vreugde daarin te vind om Hom steeds beter te leer ken? Dit is die doel van ons lewens. Sondag is die dag waarop jy al jou aandag op God mag rig. Dit is mos nie ʼn straf nie? Ek het nie tyd om op Sondae gras te sny nie. Ek hoop dat jy sal sê: ek het nie tyd om op Sondag agter die rekenaar te sit nie. Op Sondae is daar kerkdienste. Lees ʼn goeie boek. Sing saam en maak musiek. Mag ʼn mens speletjies speel? Mag ʼn mens braai?

Augustinus het gesê: Jy moet God liefhê en doen wat jy wil. Hy omseil daarmee die vraagstuk van allerlei reëls. Dit gaan oor jou hart. Dit gaan oor die liefde vir God. Al sou jy strenger as die Fariseërs wees wat die gehoorsaamheid aan reëls betref, maar jy het nie die liefde nie, dan het dit vir die Here geen waarde nie. Jy onderhou dan nie die Sondag nie.

Ek weet dat daar reëls nodig is om Sondag uit te sonder. Veral in ʼn gesin met kinders. Ek kan verstaan dat ouers sê: op Sondae bly die rekenaar af. Voor jy jou oë uitvee, is Sondag nie veel anders as Saterdag nie. My vrou gebruik op Sondae wel die skottelgoedwasser, maar nie die wasmasjien nie. Is daar ʼn verskil? Kan jy dit staaf uit die Bybel? Nee, maar ons soek maniere om die Sondag uit te sonder en om tyd te maak vir die Here en vir mekaar. Dit word deels ook deur opvoeding en kultuur bepaal.

Maak van Sondag ʼn besondere dag. Soek maniere om dit te bewerkstellig. Waak daarvoor om Sondag op ʼn Farisese manier te vier. Die Kategismus se uitleg van die Sabbatsgebod in Sondag 38 is vir my pragtig. Daarin staan niks wat jy nie mag doen nie. Daar word net dinge genoem wat jy wel mag doen.

Hou in gedagte dat die Here nie net een dag per week van ons opeis nie, maar al die dae van ons lewe! En — jy moet God liefhê!