'n Mens kan natuurlik baie sê oor die gebruik van Bybeldagboeke. Dit is verseker 'n hulpmiddel wat ons baie kan help in ons lewe met die Here. Waarskynlik gebruik mense hierdie Bybeldagboeke omdat hulle aan die een kant wil verstaan wat 'n Bybelgedeelte beteken, en aan die ander kant juis wil weet wat dit alles vir hulle lewe vandag beteken.

So 'n tydjie gelede moes ek 'n klompie boeke opruim en kom toe af op 'n paar van hierdie Bybeldagboeke. Ek begin bietjie daardeur blaai. Vir die grootste deel was ek baie teleurgesteld met wat ek gevind het. Die meeste dagboekstukkies het niks te make gehad met die teks wat opgegee is nie! Daar staan 'n teks wat gelees moet word, maar dit is eintlik net 'n versiering by die boodskap. 'n Mooi (menslike?) gedagte word uitgewerk in die dagboekstukkie, en die Skrifgedeelte is net 'n bygedagte. Of daardie boodskap nou waar is of nie, is nie hier vir my ter sprake nie. Waaroor dit vir my gaan is of so 'n Bybeldagboek ons nog werklik help! As ons werklik wil weet wat die HERE sê, en wat Hy vandag vir ons wil sê, dan is die eerste vereiste van 'n dagboek tog seker dat dit iets van die teks moet uitlê. En vanuit die uitleg dan iets wys oor wat dit vir ons beteken. Met net 'n "mooi" boodskap is ek nog nie seker wie my God is en hoe ek saam met Hom mag leef nie.