Dit bly darem maar ‘n fasinerende laaste paar verse…
Ek praat van die laaste verse van die boek Sagaria (Sag. 14:20-21).
“In dié dag sal op die klokke van die perde staan: Heilig aan die HERE!” In die Ou Testament het die hoëpriester ‘n soort kroon gedra, met dieselfde woorde daarop gegraveer (heilig aan die Here – Exodus 28:36). Dit was uitsluitlik vir die hoëpriester bedoel! Maar nou lees ons sowaar dat op die nuwe aarde selfs die perde op dieselfde manier aan God gewy sal wees. Perde, die simbool van stryd en oorlog, staan dan volledig in diens van God! En dieselfde geld vir die potte – in die Ou Testament was daar spesifieke, heilige potte vir gebruik in die tempeldiens. Jy kon nie sommer jou kombuispot aandra vir die offerdiens nie. Maar op die nuwe aarde sal álle potte heilig wees aan die Here.

Dus, waar daar in die Ou Testament ‘n duidelike skeiding was tussen die sakrale en die profane, en die sakrale ook nog verder onderverdeel is (soos sigbaar word in die heilige en die allerheiligste van die tempel), sal daardie skeiding eendag opgehef word! Dan sal die terrein van heiligheid nie meer beperk word tot die tempel nie, maar dan sal álles heilig wees. Die nuwe aarde sal een reusagtige tempel wees. En dan sal alles aan tempeldiens gewy wees! Mense en diere. Dan word die gewone burger gepromoveer tot hoëpriester, en selfs die perde sal priesterdiens verrig. Dan sal die eerste bede (“laat u Naam geheilig word”) stil word, want dan is daardie gebed verhoor tot in alle ewigheid.

Nou, wat in die hemel volmaak sal wees, moet ook hier op aarde alreeds in beginsel sigbaar wees. En daarom, wanneer ons die eerste bede bid, dan annekseer ons die hele lewe vir ons Koning. Ons bid dat die terrein van die profane al hoe kleiner word, en die terrein van die sakrale (die heilige) al hoe groter. En dit begín in ons eie lewens – ons strewe daarna dat in ons persoonlike lewens die skeiding tussen die sakrale en die profane opgehef word, dat die skeiding tussen Sondag en Maandag opgehef word, dat die skeiding tussen my christenskap en my gewone lewe opgehef word. Mag my hele lewe heilige diens wees aan die driemaal heilige God!