Dit is asof die Kerslied van die engele van 2 000 jaar gelede bo die velde van Betlehem net nie by ons wil ingang vind nie. Vrede op aarde? Waar op aarde is daar werklik vrede?

In die Midde-Ooste het vanjaar ’n bloedige oorlog uitgebreek en die hele streek bly steeds ’n kruitvat. In Irak het daar ná vredesluiting al meer Amerikaners omgekom as tydens die oorlog self. Noord-Korea toets kernbomme. Terreurbendes lê oral op loer na plekke waar hulle kan toeslaan. Tradisionele veilige lande soos Engeland en die VSA is lank nie meer so veilig soos byvoorbeeld 50 jaar gelede nie. En in Suid-Afrika word elke dag 50 mense (doodgewoon) vermoor.

In watter land, of kontinent, is daar werklik vrede? Die antwoord op hierdie vraag hang natuurlik saam met wat ons onder vrede verstaan. En hoe ons die engelesang in Lukas 2:14 uitlê.

In die Bybel het die woordjie vrede ’n besondere betekenis: dit dui op ’n mens se goeie verhouding met God, ook op ’n goeie verhouding tussen mens en mens, asook op ’n enkele mens se innerlike gemoedsrus of sielevrede. Vrede is ’n omvattende begrip wat dui op welstand, voorspoed, dit-gaan-baie-goed.

Maar só ’n soort vrede vind ’n mens te diepste net by God en sy Christus. Wêreldvrede word gekenmerk deur die afwesigheid van oorlog en geweld; Godsvrede word gekenmerk deur die aanwesigheid van geheelde verhoudings. Die wêreld verstaan onder “vrede” die handhawing van die bestaande orde; die Bybel verstaan daaronder die handhawing van God se orde - wat rus op ware geregtigheid en vryheid.

Vrede vir wie?⤒🔗

Kyk ’n mens na die verskillende Bybelvertalings van Lukas 2:14, is daar dadelik iets wat opval – bygesê dat die vers nogal vertalingsprobleme oplewer. Die Afrikaanse Bybelvertaling van 1933 (OAV) vertaal: vrede op aarde, in die mense ’n welbehae. Hieruit kan maklik die afleiding gemaak word dat dit álle mense geld. Die Nuwe Bybelvertaling van 1983 (NAV) vertaal: vrede op aarde vir die mense in wie Hy ’n welbehae het. Hierdie vertaling wil duidelik maak dat die Kersvrede veral bedoel is vir spesifieke mense, mense in wie God ’n welbehae het – sodat iets van die uitverkiesing hier sigbaar word. Waar die evangelie van Christus kom, kom daar “vrede”, so sing die engele, maar word daar ook iets sigbaar van “onvrede” (Luk 12:51), van ’n hartseer kloof in ’n gebroke wêreld.

Die Katolieke vertalers vertaal die teks baie anders. Die Nederlandse vertaling (Petrus Canisius) (1973) vertaal soos volg: Vrede op aarde onder de mensen van goede wil.

Die vraagstelling is duidelik: Is die vrede bedoel vir mense in wie God ’n welbehae het of gaan dit oor mense wat ’n goeie wil het? Gaan dit oor mense wat deur Gód gekies word of mense wat vir God kies? Gaan die inisiatief van God of van die mens uit?

Meeste Protestantse vertalings kies vir die vertaling waar God die inisiatiefnemer is. Die goeie wil kom nie van die mens nie, maar van God. Die mens se goeie wil is immers deur die sonde verinneweer (Rom 8:7; Ef 2:1).

Vrede op aarde met Kersfees? Ja, maar dis eerstens bedoel vir die kinders van God. Ware vrede is immers net by God in Christus te vind (Joh 14:27). Só gesien, is die kerk God se vredesinstituut op aarde en toonbeeld van God se bedoeling met die wêreld

Alhoewel die Kersvrede eerstens bedoel is vir die kinders van God, beteken dit nie dat dit binne die mure van kerk toegemessel moet word nie. As draers van die boodskap van vrede, moet Christene die wye wêreld in stap – die politiek en die ekonomie, die onderwys en die industrie, die wetenskap en die kuns – en orals die vredesboodskap indra. Hulle is ambassadeurs van God se vrederyk. Hulle gaan dus hulle uiterste bes doen om so ver moontlik met alle mense in vrede te leef (Rom 12:17), wel wetend dat sonder vredeliewendheid en ’n heilige lewe niemand die Here sal sien nie (Heb 12:14).

Vrede op aarde? Ja, vir die mense in wie God ’n welbehae het. Maar hulle moet die vredesboodskap verder dra, tot by die uiteindes van die aarde, en totdat die vrederyk van God in al sy volheid aanbreek.

Die redaksie van Die Kerkblad wil graag aan al ons lesers hierdie Kersseisoen ware Kersvreugde en -vrede toewens.

Mag u almal hierdie Kersfees iéts ervaar – al is dit dan net ’n klein voorsmakie – van wat ware vrede met God, met mekaar en in elkeen se hart – beteken.