Baie gedeeltes in die By­bel wys daarop dat die laaste oordeel 'n oordeel oor ons dade is (Openbaring 20; 2 Korintiërs 5).

Ons kan dit voorstel as 'n skaal wat God gebruik. In die een skaalbakkie is God se wet en in die ander skaalbakkie is ons dade.

In Galasiërs 3 lees ons dat God se standaard vir ons lewe volmaakte gehoorsaam­heid is. Dit beteken dat ons alles uit liefde vir God en ons naaste moet doen. Ongehoorsaamheid is dade wat ek sonder liefde doen (Galasiërs 5:14). Paulus gee voorbeelde hiervan in Galasiërs 5:19. Hy noem dit afgode, dinge wat ek vir my eie bevrediging doen en wat vir my belangriker as die Here is. Hierdie ongehoorsaamheid sal aan die lig kom wanneer Christus as Regter kom (Romeine 2:16). As Christus dan volgens werke gaan oordeel, maak dit die oordeelsdag skrik­wekkend, want daar is geen mens wat nie onge­hoorsaam is nie (Romeine 3:23). As heilige God kan Hy nie sy rug op die sonde draai nie.

Christus se geregtigheid⤒🔗

Dit is 'n uitgemaakte saak dat die skaal verkeerd vir ons sal weeg. Die skaal sal nie in balans wees nie: aan die een kant God se wet en aan die ander kant 'n ongehoorsame lewe.

Die Evangelie is dan juis dat God in Jesus Christus kom en Christus se goeie dade, sy lewe van gehoorsaamheid, van vol­maakte liefde, in die gelo­wige se skaalbakkie plaas.

Jesus het van harte sy Vader gehoorsaam. Hy het daarin vreugde gehad. Toe Hy aan die kruis gesê het: Dit is volbring, was die Vader gelukkig en het Hy Jesus uit die dood op­gewek. Hierdie geregtigheid (volmaakte gehoorsaam­heid) van Jesus word myne deur die geloof. Daarom kan Paulus sê ons verwagting is dat ons deur te glo, vrygespreek sal word.

Daar staan letterlik in vers 5: Ons verwag die hoop van geregtigheid. Dit is nie maar net dat ons wat glo, op daardie dag vryge­spreek gaan word nie. Christus se geregtigheid, sy heiligheid sal op daar­die dag geopenbaar word.

Wanneer Christus op hierdie dag kom, sal God se toorn kom op hulle wat nie in Christus is nie. Maar dié wat sy geregtig­heid ontvang het deur die geloof, sal beskerm word. Hulle sal wanneer die vlamme van God se toorn losbars, beskerm word deur Christus se lewe van volmaakte liefde (sy ge­regtigheid). Dit is waarop Paulus hoop. Dit is wat hy verwag. Eintlik staan daar dat hy ongeduldig, met verlange daarop wag.

Hoewel ons nie op grond van ons dade vrygespreek word nie maar op grond van Christus se geregtig­heid, praat Paulus van die dade van die gelowige. Hy noem dit geloof wat deur liefde tot dade oorgaan (vers 6). (Kyk ook Heidelbergse Kategismus, V/A 63).

←⤒🔗

Betekenis van goeie werke en beloning←⤒🔗

Wanneer jy Christus se ge­regtigheid deur die geloof ontvang het, word jy een met Christus. Net soos ge­troudes na mekaar begin lyk, begin jy soos Christus lyk. Jy is nie meer onder die veroordeling van die wet nie, maar vrygemaak (vers 1). Geloof is nie net om hierdie geregtigheid van Christus te ontvang nie maar ook om aktief die lewe van Christus te leef. Die lewe van intense lief­de. Dit is die strome van lewende water wat die Heilige Gees in jou laat op­borrel.

Dit is die goeie werke wat gaan bly staan met die oordeelsdag (1 Korintiërs 5:10) en wat beloon gaan word. Dade van liefde wat jy as vrygemaakte in Christus deur die geloof en dus deur die Heilige Gees gedoen het. Dit sal skitter met die wederkoms (1 Petrus 1:7).

Wat 'n almagtige Ver­losser is God nie! Hy wil nie dat ons net maar sal oorleef nie. Hy wil nie dat ons werke verbrand sal word en onsself soos deur vuur heen gered word nie (1 Korintiërs 3:15). Sy verlos­singsplan is 'n plan van heerlikheid. Op daardie dag sal God deur hierdie dade van ons verheerlik word (1 Petrus 2:12). Hier­die is dade wat deur geloof gedoen word –

miskien verander jy nie 'n ander nie,
miskien verander jy nie die situasie nie,
maar jyself verander, jy begin liefhê.

Dan sal dit bly staan.

'n Verstommende verlos­sing!←⤒🔗

Daardie dag sal vreeslik wees. Maar vir hulle wat in Christus is, sal dit 'n dag van heerlikheid wees. Moet nooit aan jou son­de óf jou goeie werke los van die Kruis dink nie. Moet nooit te klein van God dink nie.

Lewe as 'n Koningskind!