Die maagdelike geboorte van Christus is een van die grondslae van ons geloof. Die werklikheid en die betekenis van die mensheid van Christus is albei onlosmaaklik verbonde aan die geloof in sy maagdelike geboorte. 

Omdat hierdie waarheid so grondliggend is, word dit deurgaans aangeval. In die vroeë kerk het die Gnostici die maagdelike geboorte ontken. Dit word vandag steeds ontken.

Sommige van die moderne Bybelvertalings, soos die Revised Standard Version, ontken die maagdelike geboorte van die Christus deur die woord maagd in Jesaja 7:14 met “jong vrou” te vertaal.¹ Die Mormone ontken dit met hulle lasterlike leer dat Christus gebore is na seksuele verkeer tussen die Vader en Maria. Ander dink vandag dat die maagdelike geboorte ʼn legende is wat deur die vroeë kerk geglo is, maar wat vandag nie geloofwaardig is nie. Al hierdie aanslae teen die leer toon aan hoe belangrik dit is. Die duiwel mors nie tyd met aanslae op leerstellings wat van geen belang is nie.

Die maagdelike geboorte van Christus is, in die eerste plek, belangrik omdat dit getuig van die ware menslikheid van Christus. Christus is soos ons gebore, al het Hy nie ʼn  aardse vader gehad nie. As Hy nie só gebore was nie sou Hy nie, uitgesonderd die sonde, soos ons wees nie (Heb. 2:17; Heb. 4:15).

Die maagdelike geboorte, met die klem op maagdelik, bevestig dat, hoewel Jesus as mens uit die vlees en bloed van Maria gebore is, Hy “nie uit die bloed of uit die wil van die vlees of uit die wil van ʼn  man nie, maar uit God gebore is” (Joh. 1:13). Jesaja het ook lank tevore al gesê (Jes. 7:14) dat die maagdelike geboorte die teken is dat Jesus die Immánuel, God met ons, is.

Geloof aan die maagdelike geboorte beteken nie, soos Rome en die Switserse hervormer Zwingli leer, geloof aan die voortdurende maagdelikheid van Maria, voor of na die geboorte van Christus, om die sondeloosheid van Christus te beteken nie. Die ontvangenis van Jesus deur die krag van die Heilige Gees word onomwonde geleer in Lukas 1:35: “Die Heilige Gees sal oor jou kom en die krag van die Allerhoogste sal jou oorskadu. Daarom ook sal die Heilige wat gebore word, Seun van God genoem word”.

Die maagdelike geboorte is ʼn deel van die wonder van die genade en behoort ons nie te verras omdat dit moeilik is om te verstaan nie. Die wonder van menslike ontvangenis en geboorte is reeds vir ons ʼn geheimenis — hoe sou ons dan die wonder van die koms van Christus na hierdie wêreld ten volle kan begryp? Dat dit misken word, verbaas ons ook nie. Die maagdelike geboorte van Christus is deel van sy verlossingswerk en Hy, en sy waarheid, kan alleen in geloof aanvaar word.

Mag die wonder van die maagdelike geboorte van Christus ons rig op die selfs groter wonder van wat Hy in die vlees gedoen het toe Hy gely het, sy bloed gestort het en gesterf het vir die sonde van hulle wat die Vader aan Hom gegee het.