Die derde amp van Christus is sy koninklike amp. Daar is verskeie dinge wat ons oor sy werk en amp as Koning moet leer.

Ons moet weet dat sy koninklike amp twee aspekte behels — sy heerskappy oor die bose wêreld en sy heerskappy oor sy volk. Die eerste word die heerskappy van sy mag genoem en die tweede die heerskappy van sy genade.

Deur die heerskappy van sy mag bestuur Hy al die handelinge en selfs die gedagtes en harte van bose mense en gebruik hulle vir sy raadsplan en sy koninkryk. Hy het hierdie mag gebruik toe Hy met koninklike gesag aan Judas gesê het: “Wat jy doen, doen dit haastig” (Joh. 13:27). Hy het Judas gestuur om die werk van die duisternis te doen sodat Hy gekruisig sou word en sy bloed vir die redding van sy volk sou stort. Hy het dieselfde krag geopenbaar toe Hy diegene wat Hom in die tuin gevange geneem het, agteruit laat gaan en op die grond laat val het (Joh. 18:6) om aan te toon dat Hy gewillig na die kruis gaan.

Hierdie koninklike mag word teen en ten spyte van die wil van hulle wat teen Christus opstaan, gebruik. Hulle staan op en hou saam raad teen Hom (Ps. 2), maar Hy lag, en spot en gebruik hulle, selfs in hulle opstand, na sy eie welbehae.

Maar Hy heers ook in genade. Deur die heerskappy van sy genade regeer Hy in die kerk en onder sy volk. Hierdie heerskappy voer Hy uit in en deur die wil van sy volk. Deur sy genade verander Hy hulle wil sodat hulle Hom gewillig liefhet en dien. Hierdie aspek van sy heerskappy word in Psalm 110:3 treffend beskryf: “U volk sal baie gewillig wees op die dag van u krygsmag”.

Die verskil tussen die aspekte van die heerskappy van Christus blyk baie duidelik daaruit dat Hy die bose met ʼn ysterstaf regeer, waarmee Hy hulle verpletter (Ps. 9:7), en sy volk met ʼn herderstaf, waarmee Hy hulle na vrede lei (Ps. 23:4).

Tog moet ons ook onthou dat Hy nie as Koning net oor sy volk regeer nie; Hy regeer ook vir hulle, veg vir hulle en lei hulle in die stryd. As Koning is Hy die Veroweraar, en Oorwinnaar oor al sy vyande, die Een in wie ons meer as oorwinnaars is (Rom. 8:37).

Die oorwinning is reeds syne. Die oorwinning moet nie nog behaal word nie, maar is deur sy kruis ten volle volbring (Joh. 19:30; Kol. 2:14, 15). “Die koninkryke van die wêreld het die eiendom van onse Here geword en van sy Christus” (Openb. 11:15). Aan Hom behoort die koninkryk en die krag en die heerlikheid tot in ewigheid.

Ons moet Christus as Koning erken sodat die oorwinning ook ons sʼn kan wees. Ons doen dit deur ons aan die heerskappy van sy genade in ons harte te onderwerp. Kom ons kus die Seun wat God as Koning gesalf het, sodat sy toorn nie ontvlam en ons op die weg vergaan nie (Ps. 2:12).