Vooraf lê dit soos iets soets op die tong wat haastig gedeel moet word, na die tyd laat dit 'n bitter smaak in die mond. Skinder. Dit is nou werklik iets wat nog nooit die tevredenheid kon gee wat dit vooraf beloof het nie. En tog is dit 'n strik waarin ons telkens weer val.

Hoe moet ons as Christene oor ander mense praat? Wanneer is iets skinder en wanneer nie? Hoe moet ons met mense omgaan wat teenoor ons besig is om te skinder oor 'n ander persoon? Kom ons soek saam na 'n Christelike weg om met hierdie moeilike saak om te gaan. Voel vry om te reageer en saam te bou aan 'n nuwe Christelike lewenstyl.

Skinder is seker een van die sondes in die kerk wat die openlikste aanvaar word. Maar ons moet nie dink dat dit sonder gevolge is nie. Behalwe dat dit baie gou die liefdesband tussen mense kan afbreek, word skinder ook verbind aan die Gees wat bedroef word.

In Efe 5:29 word ons gewys op die gebruik van ons mond en woorde. Daarna, in vers 30 word dit verbind aan die Gees wat bedroef kan word. En vers 31 vervolg dan weer oor die gebruik van ons mond en woorde. In hierdie verse word ons gewaarsku vir woorde wat voortkom uit boosheid, bitterheid en woorde wat geen doel tot stigting het nie. Alles dinge wat aan skinder verbind kan word.

Dit is duidelik dat die manier waarop ons praat groot invloed het op die werk van die Gees in sy gemeente! Dit kan die werk van die Gees in die gemeente steeds meer blus. So ernstig is die saak van skinder! Ons kan dit nie slegs ignoreer nie.

In die manier waarop ons oor mense praat kan tegelyk soveel liefde straal en soveel opgebou word. Efe 4:29 wys op ons woorde wat genade kan gee aan die wat dit hoor!

Kom laat ons saam verder dink en praat oor hierdie belangrike saak...

(Hierdie is die eerste bousteen wat gelê word! Met die rubriek "Bou saam" wil ons weer gesamentlik as gelowiges 'n nuwe eenvormige, Bybelse lewenstyl bou. Bid, lees, soek, worstel. Dink saam oor hoe so 'n Christelike lewenstyl lyk. Volgens die Skrif is dit 'n lewenstyl waarop ons baie seën kan verwag, vir onsself, vir ons naaste, vir ons land, tot eer van ons God. Kom ons luister en help mekaar! Hierdie is die eerste van vele onderwerpe wat nog ter sprake sal kom)