Van kleins af glo ons dat die Bybel waar is. Later begin 'n mens soms die vraag vra: Is die Bybel regtig waar?

Hierdie vraag is vir 'n jongmens belangrik om­dat niemand daarvan hou om iets te moet aan­vaar wat nie eg is nie. Ons geloof is tog daarop gebaseer dat die Bybel dit vir jou sê. Daarom moet ons seker wees dat die Bybel waar is, anders val die bodem uit van al­les wat ons glo.

Nie die kerk nie⤒🔗

Die waarheid van die Bybel se inhoud kan nie daarop berus dat die kerk so sê nie. Die kerk kan nie gesag aan die Bybel verleen nie. Die kerk is juis gebou op die fonda­ment van die apostels en profete (Efesiërs 2:20), daar­om kan die kerk nie nou beskou word as die fon­dament vir die Bybel nie.

Die kerk is wel die verkondiger van die waar­heid van die Bybel. Maar geen sinode of kerkraadsvergadering kan sê: Ons besluit dat die Bybel waar is — en nou moet alle lidmate van hierdie kerk of gemeente dit so aanvaar nie. So 'n besluit maak nie die Bybel se in­houd waar nie.

Nie die mens nie←⤒🔗

Die geskiedenis het bewys dat die menslike verstand nie die waarheid van die Bybel kan bewys nie. Sodra die kritiese mens met selfversekerd­heid beweer dat die mens self moet bepaal wat in die Bybel werklik waar is, dan is daar probleme.

Die gevolge van so 'n menslik-kritiese benade­ring was dat sekere teoloë begin beweer het dat die Bybel uit oudtydse mites op volksverhale saamgestel is en dat die waarheid "agter" hierdie mites gesoek moet word. Nou begin die mens besluit wat is waar en wat nie. Ander het weer gesê dat God wel in die Bybel aan die woord is, maar nie in alle ge­deeltes nie. Daarom moet jy as mens besluit wat is in die Bybel werk­lik die ware Woord van God. Nou kan die mens mos uit die Bybel neem wat hom pas en wat hy bereid is om as Woord van God te aanvaar – die res aanvaar hy nie!

Die Heilige Gees←⤒🔗

Ons het die werk van God nodig om ons van die waarheid van die Bybel te verseker. Vol­gens 1 Johannes 2:20 ken ons die waarheid omdat ons deur die Hei­lige Gees gesalf is. Die Heilige Gees getuig in ons harte dat die Bybel waar is (Johannes 15:26).

Hierdie werk van die Heilige Gees is 'n wonder van God se genade. En die spore van hierdie werk word deur die ge­skiedenis van die kerk heen aangetref. Die feit dat gelowige kinders van God deur al die eeue heen die Bybel as waar beleef en aanvaar het, is 'n sterk getuienis in elke gelowige se lewe.

So voer die Here uit wat Hy as 'n verbonds­belofte gee aan ver­bondsouers met die doop van hulle kinders. Dit is Hy wat hierdie ge­loof gee, want Hy het Hom aan hierdie kindjie verbind en met die doop beloof dat Hy as Drie-enige God hierdie kind versorg. 'n Mens mag dus nie beweer dat ons van kleins af "gekondi­sioneer" of "geïndoktrineer" is om die Bybel as waar te aanvaar nie. Eerder moet ons sê dat die Heilige Gees deur die opvoeding van gelo­wige ouers die geloof in die Bybel aan verbonds­kinders gee.

Jesus Christus←⤒🔗

Enige gelowige wat die Evangelie van Jesus Christus in die Bybel hoor en dit met 'n ware geloof omhels, weet ver­seker: Hierdie Evangelie is waar. 'n Gelowige er­vaar dit in die krag wat dit jou gee. Jy beleef dit in die geloofsekerheid van jou verlossing.

'n Gelowige sien dan hoe die profesieë vervul is in Jesus Christus en tans in jou lewe waar is. Jy sien hoe duide­lik die historiese feite in die Bybel bevestig dat die werke van God in Christus tans jou lewensgeskiedenis bepaal. Soos Hy dit, volgens die Bybel, nog altyd gedoen het, doen Hy dit vandag nog. Die waarheid van die Bybel is hiervan 'n vaste fondament.