Ons moet besef dat die besluite van God die lewende en kragtige wil van God is, en nie maar ʼn plan op papier wat iewers in die hemel in ʼn vakkie weggebêre is nie. Die besluite van God is nie iets wat Hy van tyd tot tyd raadpleeg om te sien wat Hy beplan het om te doen nie, maar dit is die gedagtes van sy eie, ewige en onveranderlike verstand, wat die bron en oorsaak is van alles wat gebeur.

Wanneer God iets wil — en Hy wil alle dinge — moet dit wat Hy wil, gebeur en sal dit gebeur omdat dit sy wil is. Die Skrif is duidelik in dié verband. In Jesaja 46:9, 10 sê God: “Ek is God, en daar is niemand soos Ek nie; wat van die begin af die einde verkondig, en van die voortyd af wat nog nie gebeur het nie; wat sê: My raad sal bestaan, en al wat my behaag, sal Ek doen”. In Psalm 73:23-28 sê Asaf dat hy deur die raad van God gelei word, nie omdat hy vooraf weet wat die wil van God is en dit daarna volg nie, maar omdat daardie raad sy hele lewe en al sy omstandighede bepaal het.

Handelinge 2:23 benadruk dieselfde waarheid in verband met die dood van Christus. Daar staan dat Hy oorgelewer is in die hande van sy vyande “deur die bepaalde raad en voorkennis van God”. Wat van die dood van Christus waar is, is ook waar van ons erfdeel wat ons in Christus ontvang. Ons ontvang dit “ooreenkomstig die voorneme van Hom wat alles werk volgens die raad van sy wil” (Ef. 1:11).

Niemand kan dus God se wil dwarsboom of verander nie. Sommiges dink hulle kan. Hulle dink hulle kan die gedagte en wil van God deur gebed, hetsy deur veelvuldige gebede of deur genoeg mense te kry om te bid, verander. Ander dink hulle kan God manipuleer om hulle wil te doen met verspotte godsdienstige toertjies, maar dit is nie moontlik nie. God se wil is almagtig en onveranderlik.

 Die Skrif getuig ook onomwonde hiérvan. In Daniël 4:35 word die goddelose koning Nebukadneser verplig om te erken dat niemand vir God kan sê “Wat doen U?” nie. Romeine 9:19, 20 leer ons dat niemand God se wil kan weerstaan nie.

Selfs in die handelinge, gedagtes en wil van sy skepsele — mense en engele — is God soewerein. Spreuke 16:9 sê dat alhoewel die mens sy pad uitdink, God sy voetstappe rig. Die planne van die hart en die antwoord van die tong is ook van Hom (vs. 1). Selfs die hart van die koning is in die hand van God, en Hy lei dit waarheen Hy wil (Spr. 21:1).

Vir hulle wat glo, is die feit van die almagtige en onveranderlike besluite van God, ʼn groot troos. Dit is die rede, bo alle ander, waarom hulle saligheid seker is. Hulle wil mag verander en hulle verstand faal, maar God se wil en verstand faal nooit. Dit is die rede waarom hulle glo dat alles vir hulle te goede sal meewerk (Rom. 8:28). God het alle dinge soewerein en onveranderlik besluit en in sy besluit van hulle saligheid sal Hy nie gedwarsboom word of misluk weens engele of owerhede of magte of teenwoordige of toekomende dinge of lewe of dood of enige ander skepsel nie.

Uit Hom, deur Hom en tot Hom is alle dinge. Wat ʼn grote God en Saligmaker is Hy nie!